Falera, Trun e Stussavgia

Ei seigi il 2026 la pli gronda fiasta da musica dil mund, accentuescha il comité d’organisaziun. In tal ei seformaus avon zacons onns a Bienna pervia dalla fiasta federala da musica 2026. Ils da Bienna han surpriu quella per in motiv special: Avon exact 50 onns, il zercladur 1976, havevan els organisau la 26avla fiasta federala da musica. Lu eran 5500 musicantas e musicants da 127 uniuns separticipai ed il president dalla Confederaziun Rudolf Gnägi era staus hosp d’honur. 50 onns pli tard eis ei in bien ton dapli. Per la 35avla fiasta federala da musica dils 14 tochen ils 17 da matg 2026 ein 550 uniuns s’annunziadas cun 22’200 musicantas e musicants. Denter quellas endisch musicas dil Grischun (mira scaffa).

«Fetg bien» a Bienna

Avon exact 50 onns, il zercladur 1976, era quella fiasta stada duas fins d’jamna el marcau dil Seeland bernes. Sco quei che las gasettas da quei temps rapportan, era ei stau gis da gronda calira ed ins haveva dumbrau circa 80’000 visitaders. Era treis experts grischuns han giudicau las prestaziuns a quella 26avla fiasta federala. Ils 4 d’uost 1976 ha la gasetta «Bieler Tagblatt/Seeländer Bote publicau la gliesta da rangaziun cumpletta dallas musicas. La Societad da musica da Vignogn, sut la direcziun da Robert Casanova, era turnada da Bienna cun predicats «fetg bien», ton tier la musica da marschar sco tiels toc da pag e toc da pensum. Suenter sia fundaziun il 1920 eran ils da Vignogn viagiai l’emprema gada ad ina fiasta federala.

La Societad da musica da Mustér, sut la direcziun da Meinrad Giger, haveva schau giudicar ils experts lur tocs ella secund-aulta categoria, el marschar ha ella era retschiert il predicat «fetg bien». Cul medem resultat ei la Musica da Trin returnada dalla fiasta federala. Oz ei quell’uniun da gronda tradiziun pigiurada considerablamein, ils musicants da Trin sunan en ina formaziun communabla cun Favugn. Lezza musica era 1976 ina dallas fermas el Grischun e sunava ell’emprema classa.

Buca a Bienna

Allas siat musicas grischunas ch’ein separticipadas avon 50 onns alla fiasta federala a Bienna ei quella aunc en viva e buna memoria. Ils da Vignogn havevan sunau avon ils experts il toc da pag Hym to music», il toc da pensum «In Memoriam» ed il toc da marschar «King size». Suenter lur retuorn ella patria havevan duas musicas, la Musica da Vrin e la Musica dil marcau da Glion, e tuttas bandieras dallas uniuns da Vignogn, fatg gia a Glion in grond beinvegni alla societad.

Uonn ha la Societad da musica da Vignogn mess autras prioritads. Ella viagia buca a Bienna alla fiasta federala. Era l’Uniun da musica da Sagogn buca, ina dallas actualmein fermas formaziuns. Persuenter ein treis autras sedecididas dad ir a Bienna: La Societad da musica da Falera, cul dirigent Adrian Degonda, e la Societad da musica da Trun, cun Duri Cathomen, figureschan ina sper l’autra el register dallas 550 musicas. Plinavon sepresenta era la «pintga» musica da Stussavgia, la MG Alpenrösli, avon ils experts a Bienna. 1976 havevan era treis experts grischuns giudicau las prestaziuns, numnadamein Theo Caliezi, Arnold Spescha ed Ernst Lampert.

Sch’ins sfeglia en quei register, dattan plirs nums d’auters dirigents sursilvans en egl. Aschia diregia Rafael Camartin, oriund da Breil, duas formaziuns, il «Sinfonisches Blasorchester SIBO Bern» e la MG Konkordia Aedermannsdorf, in vitg el cantun Solothurn. Roman Caprez, oriund da Trin, meina duas brassbands ella Svizra centrala: la MG Risch-Rotkreuz suna ella categoria superiura e la MG Root ella 2. Classa. Roman Caprez ha dil reminent dirigiu biars onns la Brassband Sursilvana e la Societad da musica da Falera.

Las suandontas societas ed uniuns da musica grischunas ein s’annunziadas e vegnan a separticipar alla 35avla fiasta federala da musica a Bienna: