12 minutas cunter rassissem

Conferenzas da medias cun trenaders da ballape n’èn atgnamain betg muments istorics, era sche reporters e reportras da sport dovran memia savens l’adjectiv «istoric»!

Da temp en temp datti però conferenzas sportivas ch’èn memorablas! Tut che sa regorda per exempel da la famusa tirada da Giovanni Trapattoni avant 28 onns («Ich habe fertig!»). E dacurt, ils 20 da favrer 2026, hai puspè dà a Minca tar il FC Bayern ina conferenza remartgabla. Atgnamain eri mo ina simpla prevista sin il proxim matsch. Però sin ina dumonda ha il trenader dal FC Bayern, Vincent Kompany, dà ina resposta da 12 minutas. Ina resposta spectaculara!

La preistorgia: En in gieu da la Champions League tranter Benfica Lissabon e Real Madrid sto in giugader da Benfica avair permalà pliras giadas rassisticamain il superstar (da pel stgira) Vinícius Júnior. Quel sa dosta, recloma tar l’arbiter e survegn sustegn da ses collegas d’equipa. Però suenter il gieu defenda il trenader da Benfica Lissabon, José Mourinho, ses agen giugadur e di che Vinícius Júnior saja sez la culpa e che ses club Benfica na saja segir betg rassistic, cun tut la preistorgia dal famus giugadur «nair» Eusebio dals onns 60.

Paucs dis suenter il gieu a Lissabon vegn Vincent Kompany – in Belgiais cun in bab derivant dal Congo – apunta pledentà a Minca sin quest cas. El prenda chatsch a la fin da sia conferenza e discurra 12 minutas en fila (per englais). El analisescha, contextualisescha, sa regorda dad atgnas experientschas e crititgescha las «stgisas» da José Mourinho. Il pledoyer da Vincent Kompany è talmain cler, emoziunal, persunal, analitic, filantropic e cumpetent ch’i vala la paina da guardar quellas 12 minutas ch’ins chatta sin Youtube.