Meis prüms gös olimpics – live

Chi da Vus cugnuoscha amo il slogan da l’emettur da televisiun da sport tudais-ch, «DSF» da seis temp (uossa «sport1»): «Mittendrin, statt nur dabei»? Üna recloma dals ons novanta ch’impromettaiva a sias spectaturas ed a seis spectaturs ün’experienza televisiva intensiva ed immediata.

Üna tala experienza – simplamaing sainza «DSF» – n’haja pudü passantar dürant ils gös olimpics da Milano Cortina. Per l’üna suna stat in acziun pella FMR, ingio ch’eu n’ha accumpagnà a duos persunas invoutas a l’ur dals gös olimpics intuorn Livigno. E per l’otra suna stat a verer, sco spectatur ed insembel cun mia figlia, la partida da curling da las duonnas per la medaglia da bruonz (Canada-USA) a Cortina d’Ampezzo.

Cunquai cha’ls gös olimpics da quist on han gnü lö uschè dastrusch – praticamaing davant porta d’chasa – es stat meis buonder natüralmaing eir tant plü grond. «Uschè üna schanza nu’s das-cha laschar passar», n’haja pensà. Impustüt na, perquai chi füssan meis prüms gös olimpics live in persuna e perquai ch’eu sun ün paschiunà fan e giov eir svess a curling. Dal rest, mia figlia eir. 

E quai ch’eu n’ha pudü observar cun meis ögls olimpics vergins, sun stats duos lös ospitants (Livigno e Cortina) magara differents ün da l’oter.

Livigno: bainschi impreschiunant cun tuot seis implants da freestyle e d’acrobatica chi sun gnüts fabrichats intuorn ed intuorn cumün, fans, squadras e funcziunaris vestits illas culurs da lur pajais e voluntaris chi paraivan da giodair lur congedi ün zich plü particular. Suot il strich però, sainza grond’atmosfera olimpica.

Cortina d’Ampezzo, invezza: bainschi eir ün zich plü modest co quai ch’eu vaiva m’imaginà per ün dals duos lös ospitants principals, però modest in ün möd simpatic. Chaminond tras giassas plain vita e decoradas culs rinchs olimpics e cun binderas, speravia a differentas chasas da las naziuns e lura al fö olimpic – il plü tard là, es la sbrinzla saglida via eir sün mai.

Nimia cha mia valütaziun haja da chefar culla radschun da mias duos visitas. Eu n’ha giodü Livigno güsta tant dürant la lavur, sco Cortina d’Ampezzo dürant meis temp liber. L’unic forsa chi ha fat ün pitschna differenza, pudair passantar sco bap temp prezius insembel cun l’aigna figlia. Chi sa quant lönch cha quai sarà amo cool?

A tuotta via es meis facit il seguaint: Organisar gös olimpics plü modests e decentrals, e rivar da mantgnair al listess mumaint quista attracziun pumpusa i’l passà, sarà üna sfida. Ha l’Italia fat tuot inandret? Na, quia daja dal sgür amo bler potenzial! La via inchaminada es però sgüra la dretta.

Ed in vista a pussibels gös olimpics decentrals in Svizra, am renda pustüt ün inscunter a Cortina cun üna gruppa canadaisa fich superbi. Cha surtuot il «House of Switzerland» saja statta üna da las plü grondas attracziuns per els. Ün lö d’inscunter particular ingio chi’s sainta simplamaing fich bainvis e da chasa.

Uschè cha scha gös olimpics vessan da gnir realtà in Svizra, schi sun eu da bun anim cha cun nossas valurs e qualitats pudaina spordscher precis quai chi ha forsa mancà quista jada: ün’intera Svizra «d’immez aint, invezza da be daspera».