Alicia Beer ei campiunessa svizra culla buis d’aria

La stagiun d’unviern cul tir endadens ei ida a fin sonda e dumengia vargada. Per conclusiun da quella ein las campiunessas ed ils campiuns svizzers vegni erui. Denter quellas e quels ch’ein stai sisum il podest ei era Alicia Beer da Rueras en Val Tujetsch. Per la Tuatschina ei quei in ulteriur grond success en sia aunc giuvna carriera el sport dil tir.

Ei ha duvrau gnarva

Suenter ch’il campiunadi svizzer d’avon in onn ei buca reussius ad Alicia Beer tenor giavisch, eis ella semessa cun empau nervusadad el stan da tir la fin dall’jamna vargada a Berna. Bein savend ch’ella seigi en buna fuorma eis ella tonaton stada optimista. Cun 626,4 puncts (60 siets) ha ella gudignau la qualificaziun ed aschia mussau si’ambiziun. Sco tier tuttas autras categorias ein era en quella dallas junioras sut 21 onn las otg meglieras sequalificadas pil final. En lez ei vegniu sittau tenor il sistem da ko. Quella cul mender resultat suenter dudisch siets ei curdada mintgamai ord concurrenza e silsuenter mintgamai ulteriuras suenter dus siets. La fin finala ein restadas duas tiraduras el final dil final ed en quel ha Alicia Beer defendiu igl avantatg e gudignau la concurrenza cun 247,5 puncts ed in avantatg da 0,4 puncts avon Maya Leicht dil cantun Sviz.

Semigliurada successiv

Schegie che la partenza el final ei buca reussida cumpleinamein ad Alicia Beer, eis ella seluvrada successivamein dalla rangaziun siadora. Aschia sa Alicia Beer ch’appartegn al cader naziunal da junioras e juniors da Swiss Shooting terminar la stagiun cun in success cumplein. Per saver sededicar cumpleinamein al sport da tir vegn ella buca mo sustenida da sia famiglia, mobein era da sponsuras e sponsurs dalla regiun.