Il zenn grond ei puspei cumplets

Cuort avon il survetsch divin ils 24 da december 2026 allas 17.00 ha il zenn grond dalla baselgia parochiala da s. Glions a Mustér calau da resunar. In’uatga dils responsabels per la baselgia ed il clutger ha allura sclariu ils motivs dil silenzi dil zenn. Ina part dil battagl era sedistaccada e curdada atras dus plantschius da lenn dil clutger avon che sefermar sin in tierz. La mesadad dil battagl curdada naven haveva ina peisa denter 80 e 100 kg.

In niev battagl

Dapi ils 25 da fevrer 2026 – pia ualti exact suenter dus meins – ei il zenn puspei intacts. «Il zenn grond resuna puspei, grazia ad in niev battagl. Quel peisa 132kg ed ei aschia pli levs ch’il vegl. Il culiez dil battagl posseda ina fuorma cilindrica ed ei cheutras pli stabils ch’il vegl. Ch’il zenn tuna pli lom ha da far culla qualitad dil metal. Pli savens ch’il battagl petga encunter il zenn e pli dirs ch’el vegn. Cheutras vegn era il tun pli dirs cul temps.» Quella communicaziun dil responsabel per las immobilias dalla Pleiv catolica s. Gions Mustér, Gion Tenner, san ins leger silla homepage dalla pleiv.

Cun agid da schirellas

Il battagl niev ei vegnius culaus dall’interpresa Wensauer en Germania e montaus dall’interpresa MuriBaer da Büron. Quater persunas ein stadas involvidas ella montascha ch’ei succedida cun agid da schirellas. Ils 6 da schaner 2026 havevan specialists da MuriBaer giu priu las mesiras dil zenn, respectivamein dil battagl niev per saver planisar e la fin finala schar cular in niev. La finamira da saver metter en funcziun il zenn grond da Pastgas ei pia pli che severificada. Il battagl niev cuosta rodund 7600 francs. Il zenn grond dalla baselgia parochiala s. Gions a Mustér ha ina vegliadetgna da pli che 100 onns. El era vegnius culaus 1917 ad Aarau.