Integrar tant scu pussebel er la populaziun

Siva dalla fusiun digls cumegns da Surses igl 2016 ad en cumegn politic dattigl a Beiva l’organisaziun locala, la «Pro Bivio». Chella s’engascha pigl interess dalla populaziun indigena e pigls giasts da Beiva. L’uniun ò er igl intent da promover activitads culturalas, turisticas e da sport an vischnanca.

Ultra da chegl segna la uniun er pigl contact e per la tgira anvers terzas persungas. L’organisaziun è tranter oter er igl post da contact per tscherts interess per la mastranza, igl turissem e l’agricultura ed oters purtaders da prestaziuns locals.

La «Pro Bivio» segna er pigl svilup digl li, ella accumpogna projects ed organisescha er occurrenzas publicas cun temas tgi fatschaintan igls Bivians e las Bivianas e lour giasts. Proximamaintg ò lia a Beiva ena occurrenza publica, tgi sa drezza betg angal alla populaziun dalla vischnanca agl pe digl Pass digl Gelgia, mabagn er a giasts ed a tot las persungas interessadas dall’antiera val.

Siva da 40 onns en tema

Igl cumegn da Surses è s’exprimia anvers l’uniun «Pro Bivio» cugl giaveisch da collaborar pi ferm cugl avigneir da Beiva e cunzont er da piglier pi serious igls giaveischs dalla populaziun pertutgont igl futur digl li.

Chegl è er egna dallas raschungs tgi dat proximamaintg l’occurrenza d’infurmaziun publica a Beiva. Tar chella vign cunzont er tematiso igl sviamaint da Beiva, en tema tgi caschunga gio siva da 40 onns per discussiuns pi grondas tigls indigens e giasts da Beiva.

La «Pro Bivio» less saveir dalla populaziun biviana ed era digls giasts schi igl cumegn da Surses duess venavant persequitar igl project da sviamaint antras en tunnel, scu para l’unica soluziun per discarger igl li digl grond traffic? Digl reminent, an media passan per de Beiva an tottas dus direcziuns vers 4000 autos.

En campadi a Gravella?

L’annavada tecnica per la loipa tgi sa catta aint igl nord da Beiva a Gravella è gist chest anviern stada en tema cun mantger la neiv naturala. La «Pro Bivio» less er saveir dalla populaziun e digls giasts schi igl cumegn da Surses duess far las investiziuns basignevlas per annavar la loipa, uscheia tgi fiss pussebel da far passlung er igls anvierns cun pi paca neiv naturala.

Cun la revisiun parziala digl li èn er novas veias e sendas da viandar en tema a Beiva. Tranter oter è er previa da far ena veia da viandar davent dalla stalla communabla agl campadi Tua. Cò duessigl dar en punt sur la Gelgia. Igl davos pled an chella tgossa duess er la populaziun da Beiva aveir. Preschento a caschung dalla seira d’infurmaziun publica vign er antras Stefan Steiner, el tgi segna tigl cumegn Surses pigl svilup digl li e digl turissem, igl studi pertutgont en’eventuala realisaziun d’en plaz da campadi a Gravella, aint igl manevel digl hotel Guidon.