50 000 francs per mintga unfrenda

«Spert», «svelt» e «speditiv» – quests pleds ha duvrà bunamain mintga oratur e mintga oratura la mesemna en il Cussegl dals chantuns. L’agid per las unfrendas da Crans-Montana stoppia succeder immediatamain e betg pir forsa en in onn. Cun 33 cunter 3 vuschs e 7 abstenziuns è la chombra perquai s’exprimida per ina lescha urgenta.

Uschia po la Confederaziun pajar ina pauschala da 50 000 francs a mintga unfrenda ed a mintga famiglia da persunas disgraziadas l’emprim da schaner en l’incendi a Crans-Montana.

En pli vegn installada ina maisa radunda che tschertga enclegientschas tranter unfrendas ed assicuranzas. Uschia na duain ils pertutgads betg stuair spetgar onns ora fin che las dretgiras han terminà ils process encunter ils responsabels. Per la maisa radunda impunda la Confederaziun maximalmain 20 milliuns francs.

Schanegiar assicuranzas e culpabels

Critica ha exprimì Primin Schwander da la PPS. El ha proponì da betg entrar en materia. Il sistem d’agid da victimas prestia gia oz agid immediat. En pli schanegian ins cun proceduras d’enclegientscha – per tudestg «Vergleichsverhandlungen» – las assicuranzas, ils responsablas e las autoritads che hajan fallà. «Il mender per las unfrendas èsi, sche las persunas culpablas na vegnan betg fatgas responsablas cun tut ils meds dal stadi da dretg», ha ditg il cusseglier da Sviz.

«Sa chapescha che las dretgiras ston sclerir las responsabladads penalas e da dretg privat», ha ditg Beat Rieder dal Center. Ma talas proceduras possian cuzzar onns, sche betg perfin decennis fin ch’ina unfrenda survegnia ina indemnisaziun. Perquai sajan proceduras d’enclegientscha impurtantas, ha ditg il cusseglier vallesan.

Cun 37 cunter 7 vuschs è il Cussegl dals chantuns entrà en materia.

Pazients ambulants na survegnan nagut

Era Esther Friedli da la PPS è s’exprimida a moda critica. «Jau sun vegnida a la conclusiun che bler n’è anc betg sclerì, nus duessan passar sin ils frains.» Ella ha giavischà da renviar la fatschenta al Cussegl federal.

La pauschala da 50 000 francs survegnian famiglias dals 41 morts e las 85 unfrendas che sajan stadas en «tractament staziunar». Ma las 30 unfrendas, che sajan vegnidas tractadas be a moda ambulanta, na sajan betg menziunadas en la lescha, ha ditg la cussegliera da Son Gagl. I dettia dentant era tar ils pazients ambulants cas da direzza. Il Cussegl federal duai perquai anc ina giada examinar ses sboz da lescha.

Cun 29 cunter 14 vuschs ha la Chombra pitschna dentant desistì da renviar la fatschenta. Pliras giadas èsi vegnì fatg attent en la debatta ch’il Cussegl naziunal possia gea anc far remedura e precisar, tgi che ha tut propi il dretg sin la pauschala. La Chombra gronda discutescha il proxim glindesdi la lescha urgenta.

Pussaivladad da prender regress

«Nagin na less pretender enavos in di daners da las unfrendas», ha ditg Andrea Caroni da la PLD. Ma il dretg da prender regress per ils 50 000 francs giaja vi a la Confederaziun. Quest dretg da regress è la suletta midada ch’il Cussegl dals chantuns ha fatg en il sboz da lescha.

Il mecanissem da regress funcziuna sco suonda: Las assicuranzas u ils responsabels che ston indemnisar las unfrendas, pajan l’emprim ora las unfrendas. Be sch’i vanzan lura anc daners dad assicuranzas u da persunas u autoritads responsablas, po la Confederaziun far valair in regress per ils daners ch’ella ha pajà ora ad unfrendas e famiglias da disgraziads.

En la debatta da la mesemna ha il minister da giustia Beat Jans dentant menziunà, che las garanzias, l’uschenumnà «Deckungsgrad», da las assicuranzas na bastian per lunsch ora betg per indemnisar las unfrendas da questa gronda catastrofa.