Sper l’En vain fatta üna punt sur il foss da rösti

Cun il titel «Schmolitz», inspirà da l’expressiun da la Svizra francesa «faire schmolitz» per descriver il ritual da l’amicizcha, voul il festival LitteraturA Nairs dar vita quist on al dialog litterar tanter la Rumantschia e la Romandie. Sco cha l’organisaziun scriva in üna comunicaziun a las medias, vain l’inscunter inaugurà als 14 marz dal nouv directur da Pro Helvetia Michael Kinzer. A quel pled d’avertüra illa chasa d’art da la Fundaziun Nairs segua ün essay litterar da l’autur Walter Rosselli davart la plurilinguità e l’amicizcha.

Performanzas e promenadas litteraras

Sper prelecziuns, lavuratoris e referats vegnan sportas in sonda a Nairs tschinch nouvas performanzas litteraras: Tanter oter declama Antoinette Rychner ün omagi poetic a l’avair chüra ed al liom cul spazi vital. Carin Caduff e Valentin Bezzola quintan istorgias tortas intuorn la tematica da’s chattar e laschar ir. Da vart rumantscha contribuischan eir Tina Planta-Vital, Janic Maskos e Bigna Guler aignas performanzas o promenadas poeticas.

Render onur a Denise Mützenberg

Ün oter focus metta il festival a la traducziun litterara, cun quai cha l’occurrenza es svessa eir bilingua – rumantsch e frances. Uschè vain tanter oter onurada a Nairs la traductura ed editura Denise Mützenberg per seis grond ingaschamaint da plüs ons.

Ün accent ludic fuormarà tenor las organisaturas la sonda saira il Poetry Slam Ladin intercultural cul titel «Superschmolitz». Cha quel reunischa corifeas dal slam da la Svizra francesa e la nouva generaziun da slam rumantscha. Tras quel program da la saira maina la moderatura Gianna Duschletta chi «pissera per pointas interlinguisticas», sco cha LitteraturA Nairs scriva in sia comunicaziun.