Il Revier Gonda senza Schluein

La vischnaunca da Sagogn ha tractandau a caschun dalla radunonza communala dils 20 da mars 2026 la fundaziun dil Revier forestal Gonda. Ella vul fundar quei niev revier cun las vischnauncas da Laax e Falera sco quei ch’ins sa leger el messadi per mauns dalla radunonza communala. El messadi fa la suprastonza communala attent alla decisiun unanima dil suveran da Sagogn dil december 2025 da fundar in revier forestal cun las vischnauncas da Laax, Falera e Schluein. La radunonza communala da Schluein dils 18 da december 2025 ha denton renviau la damonda da separticipar al revier forestal claramein cun 27 NA enviers sulet 11 GIE.

Tenor surfatscha e tagl annual

La vischnaunca da Sagogn scriva en siu messadi che la gruppa da project seigi sedecidida da cuntinuar senza la vischnaunca da Schluein. Quei vevan las treis vischnauncas gia annunziau cuort suenter il NA da Schluein. Per quei intent sto la clav da reparter ils cuosts ni in eventual gudogn vegnir defini da niev. La clav sebasa tenor il messadi sin la surfatscha d’uaul da mintga singula vischnaunca e sil tagl annual. Laax porta tenor la nova clav da repartiziun era la plipart dil capital da participaziun al niev revier da 350 000 francs, numnadamein 50,75 %, Sagogn aunc 26,80 % e Falera 22,45 %. La suprastonza da Sagogn propona alla radunonza communala d’approbar las statutas dil revier communabel e da conceder il capital da partenza.

In contract per Schluein

La vischnaunca da Schluein vegn pli probabel a far in contract cun quei niev revier enaquella ch’el ei fundaus. Quei confirma il president communal Ralf Schlaepfer sin damonda dalla FMR. In contract che segirescha ch’igl uaul da Schluein vegn era vinavon nezegiaus e tgiraus. Ralf Schlaepfer ei denton dil meini ch’ils cuosts caschunai alla vischnaunca entras quei contract vegnien ad esser pli aults visavi als cuosts ch’eran previ neu dalla participaziun dalla vischnaunca al revier communabel.

Ch’il suveran da Schluein ha renviau il december vargau la participaziun al revier, ei d’attribuir principalmein al NA dil suveran da Laax al project da fusiun dallas vischnauncas da Laax, Sagogn e Schluein l’entschatta digl onn 2023. Quei fatg confirma il redactur dalla FMR ch’ei staus presents alla radunonza communala da Schluein il december vargau. Il NA da Laax digl onn 2023 para che la plipart da votantas e votants da Schluein ha aunc buca magunau diltut.

Simplificar la lavur

Dapi onns possedan las vischnauncas da Sagogn e Laax in revier communabel cun ina gruppa forestala tgamunada dil selvicultur Maurus Cavigelli. El e sia gruppa forestala han era surpriu las lavurs d’uaul per las vischnauncas da Schluein e Falera. Maurus Cavigelli tschontscha dad ina construcziun empau cumplicada gest ord vesta administrativa. «Jeu stoi far giu quen separadamein cun las quater vischnauncas.» Sustegnan las radunonzas da Falera, Laax e Sagogn la proposta da fundar in revier communabel, sto Maurus Cavigelli mo aunc tschentar quen separadamein alla vischnaunca da Schluein, priu il cass ch’il suveran accepta il contract da collaboraziun.

En discussiun a Schluein ei era vegnida l’idea da seligiar cul revier forestal dalla vischnaunca da Glion. Avon la fusiun dalla vischnaunca da Glion era Schluein numnadamein part dad in revier communabel cun Ladir e Falera. Ton Ralf Schlaepfer sco Maurus Cavigelli ein denton sceptics che quella idea selai realisar, perquei ch’il Cantun definescha il perimeter dils reviers. Tenor tgei principis ch’igl Uffeci d’uaul e prighels dalla natira definescha il perimeter dils reviers el Grischun ei buca stau d’eruir sin la fin da redacziun. Forsa ei la vischnaunca da Glion era buca gest incantada dad integrar igl uaul da Schluein en lur menaschi. La finala ha Schluein avon onns era getg NA alla fusiun communala cun la vischnaunca da Glion.