La tecnica sco aventura ella Distec SA

«La tecnica sco aventura.» – Sut quei motto organisescha la Distec SA a Mustér per in’ulteriura ga ina revista da professiuns. ­Mesjamna, ils 18 da mars 2026 dallas 14.00 entochen las 17.00 seporscha a giuvnas e giuvens dalla Surselva interessai vid la tecnica la caschun da mirar davos las culissas dall’interpresa. Els e lur geniturs retscheivan in’investa ellas professiuns dil polimecanist e dil mecanist da producziun. «Tgi ch’ei fascinaus dalla tecnica, lavura precis e less capir co tocca da construcziun d’aulta cumplexitad vegn elavurada, ei cheu el dretg liug», scriva la Distec SA en ina communicaziun als mieds da massa. Emprendistas e specialists dall’interpresa muossan co maschinas modernas da CNC vegnan programmadas, dirigidas e survigiladas. Alla revista da professiuns vegn dau in’investa ell’automatisaziun e robotica dil mintgadi dalla Distec SA.

Hightech el cor dalla Surselva

«Nus construin tocca precisa pil diever pretensius, d’autos da cuorsa entochen satellits e projects dall’astronautica per viadis silla glina ed il Mars», scriva la Distec en sia communicaziun als mieds da massa. En siu luvratori da scolaziun instruescha la Distec SA 20 emprendistas ed emprendists. Suenter lur temps da scolaziun han els la caschun da s’avanzar ell’interpresa. Alla revista da professiuns presentan las emprendistas ed ils emprendists lur lavurs, raquentan da lur temps d’emprendissadi e rispundan damondas. Cumpletada vegn la revista cun ina spassegiada atras la producziun. Ella muossa con variontas ed interessantas che professiuns tecnicas ein. Per finir envida la Distec SA ad in apero. Tgi che survegn plascher dallas clamadas dil polimecanist ni mecanist da producziun, sa era absolver in fuffergnadi ella Distec SA.