Tschun gadas Happy Day
Mireis vus bugen l’emissiun da larmas Happy Day ella televisiun? Jeu buc! E sche nus dein inaga ina sonda sera ell’emissiun, ditgel jeu mintgaga a mia famiglia: Da quei fagei lu mai cun mei!
Uss hani fatg ei! Also buca mia famiglia, mobein «miu» chor! A caschun da miu 50avel anniversari hai dau il dètg Happy Day – e lu buca semplamein mo in, mobein gest tschun! Mintga register fa in Happy Day cun e per mei ed en retscha cul sopran, igl alt, il tenor ed il bass ei era aunc la dirigenta semessa. Pia datti propi tschun surpresas per mei.
Aunc avon Nadal hai jeu aschia saviu guder ensemen culla dirigenta «Gionin e Gretina» el Teater Cuera. Ordavon hai dau caffè e petta, ina buna paterlada e suren in vin cauld. Tgei deletg!
Ed aunc avon ch’igl onn ei ius a fin sesevel jeu cugl entir sopran el kino. Nus havein occupau in’entira retscha sezs pulstrai. Ordavon havein nus gudiu ina buna tscheina, aschia che la Betty Bossi silla teila gronda ha gest aunc arrundau il menu.
Era cul tenor hai dau tscheina e quei tiel bassist Giuli da Breil. Ella tegia Rasuz havein nus passentau ina bellezia sera – jeu e «mes» quater tenors. E secapescha era cul Giuli. Atgnamein ei la surdada da quei schenghetg gia stada il punct culminont. Tuts quater tenors eran numnadamein sevestgi sco Giulis cun camischa da quaders e fazalet tgietschen entuorn tgau. Tgei risadas, gie schizun il Giuli original ha stuiu surrir.
Ils bassists lain sgular mei. Els han regalau a mi in sgol da tandem cun in parasgulader ed han manegiau ch’els sesien lu en in’ustria e spetgien entochen che jeu seigi puspei setschentada. Moscha lu, viva!
E las altistas laian mei aunc ellas marveglias. Jeu survegnel dapi il november vargau mintga meins in legn dad ellas che dat lu a mi il proxim bustab. Il mument sun jeu tier AST … ed jeu sai buca tgei che suonda. Proximamein vegn lu mattei il legn dil mars. La data per quei Happy Day ei fixada sin la fin matg. Dapli detagls suondan …
Ei drova buc in Röbi Koller ni in Nick Hartmann per vegnir tier in ni schizun plirs Happy Days. Ei drova persunas ch’ein attaschadas ed engaschadas e promtas d’impunder temps per far in plascher a zatgi. Las 30 cantaduras ed ils cantadurs inclusiv la dirigenta han oravontut priu peda per mei. Els han desistiu sin ina sera a casa cun lur cars, sil suentermiezdi liber, ni schizun sin Happy Day ella televisiun per passentar cun mei entginas uras da cuminonza. Quei ei in schenghetg nundetg. E dapi la surdada da mes tschun Happy Days sai jeu capir ch’ins anfla buc ils dretgs plaids per engraziar, che las emoziuns surprendan ins e las larmas culan senza retenientschas. Probabel sun jeu sedepurtada sco quellas e quels ell’emissiun dalla sonda sera che bragian e singluttan da spir emoziuns.
Na, Happy Day mirel jeu aunc adina buc ella televisiun. Jeu sun dil meini che jeu hagi survegniu las pli bialas surpresas e quei tut mo per mei, senza cameras e firlefanzas.
Gust da leger dapli?