Niev slontsch pil cont
Vendergis ha il Chor viril da Domat beneventau ella halla Tircal dalla casa da scola la radunonza annuala dil District da cant Surselva. Igl ei stau la 159avla da quell’organisaziun. Enstagl da pigiurar registrescha ella actualmein in carschen ed in svilup legreivel.
«Il district dumbra da niev 940 commembers. Jeu manegiel che quei mereti in grond applaus», ha il president dil District da cant Surselva (DCS) getg en siu rapport annual. Gl’applaus han delegadas e delegai presents fatg bugen per las novitads che Daniel Pally ha purtau. En siu rapport annual ha el menziunau ch’il diember da commembers seigi carschius, la megliera novitad seigi denton che la radunonza astgi beneventar dus novs chors el DCS.
Sustegn dall’uniun cantunala
Avon in onn ha Daniel Pally surpriu il tgamun dil DCS. Alla radunonza a Sumvitg eran las delegadas ed ils delegai s’exprimi claramein encunter ina centralisaziun. En connex cun sia reorganisaziun haveva l’Uniun cantunala da cant dil Grischun proponiu als districts da sesligiar e d’integrar tuts surveschs ell’uniun tetgala. La radunonza dils chors sursilvans ei sedecidida per ina varianta regiunala. Il bien contact e la cooperaziun cull’uniun cantunala garantescha Daniel Pally, el fa part dalla suprastonza dall’uniun cantunala. «Quella sustegn nus fetg», ha il president declarau en siu rapport presidial.
Il Chor viril da Domat ha beneventau las delegadas ed ils delegai dils chors sursilvans. Quei chor, fundaus 1867, dat perdetga dalla viarva romontscha a Domat. Avon varga 20 onns eis el associaus al DCS ed ha era organisau la fiasta da cant districtuala. La buna articulaziun dallas canzuns ha cumprovau ils ferms ligioms culla Surselva.
Bunamein 1000 activs
Da niev fan era il nievfundau Chor baselgia ecumen Sagogn ed il Chor viril baselgia s. Gions Mustér part dall’uniun tetgala regiunala. Il chor da Sagogn ei in mischedau e dumbra actualmein 32 cantaduras e cantadurs. Il chor da Mustér ha 20 cantadurs. Cun bunamein 1000 commembers cuntinuescha il DCS sia via el futur. All’entschatta dalla radunonza ha il president supplicau ils presents da seregurdar d’ina persuna stimada e meriteivla che ha finiu siu cuors terrester. Gion Giusep Derungs ei morts igl 1. da fevrer 2026, el ei staus attaschaus fetg al cant ed als chors, per el ha la radunonza fatg in memento.
Ch’il cant en Surselva viva e che quel ei habels da dumignar las sfidas han las activitads digl onn vargau mussau. Daniel Pally ha dau ina retrospectiva da quei che la suprastonza nova ha instradau. Albert Spescha fa part, ensemen cun Flavia Walder, dalla cumissiun da musica. El representa il medem mument l’Uniun ceciliana dalla Surselva. L’actuara Maria Candinas ei en siu post dapi 2017, la radunonza ha reelegiu ella unanimamein. Alice Bertogg, entrada onn vargau en suprastonza ensemen cun Flavia Walder, tgira las finanzas dil DCS.
Plirs accents
«Nus vegnin ad empruar ora zacontas ideas novas, adina cugl intent da sustener ils chors», haveva Daniel Pally empermess avon in onn, suenter sia elecziun, en discuors culla FMR. El ha fatg part 15 onns dalla cumissiun da musica dil DCS , ei motivaus e sa nua ch’ils basegns ein. Il bien contact cull’uniun cantunala tgira el vinavon. Ei seigi in avantatg pils chors sursilvans, ha Daniel Pally sincerau. Malgrad che l’uniun tetgala dils chors sursilvans tegn sapientivamein sia atgna identitad resta l’uniun cantunala ina partenaria da confidonza.
En siu rapport ha il president menziunau la nova plattafuorma d’informaziun «Novitads dil DCS». Igl ei in fegl d’informaziun ch’ei vegnius distribuius all’entschatta digl onn da cant 2025/26.
Empustar instrucziun
Era il survetsch «Nus visitein vus» ei novs. Per sentir il puls ed entrar en contact direct culs chors visetan ils commembers dalla suprastonza tuts 35 chors. Dalla scolaziun da vusch ein 12 da quels separticipai. Quella purschida cuntinuescha en collaboraziun culla Scola da musica Surselva e l’Uniun ceciliana Surselva. Ils chors han la pusseivladad d’empustar lecziuns collectivas ed individualas culla pedagoga da musica Letizia Scherrer.
Era l’jamna da cant dils affons cuntinuescha. Quella ei la stad proxima dils 3 tochen ils 7 d’uost 2026 culla squadra cumprovada. Puspei vegnan biebein 80 affons da plirs scalems ad exercitar in program culla tematica «sentiments e pialgaglina». Ina sentupada per dirigentas e dirigents vegn ei puspei a dar sco era in gi da cant per ina e scadin vegn il DCS a porscher.
Las veteranas ed ils veterans districtuals
Alla 159avla radunonza da delegai a Domat ha la suprastonza districtuala saviu undrar las suandontas cantaduras e cantadurs per lur fideivladad da 25 onns:
Chor mischedau Andiat: Ines Dietrich; Chor mischedau Rueun Siat: Denise Degonda; Chor mischedau Sumvitg-Cumpadials: Irma Collenberg; Uniun da cant Vuorz: Ursula Kobler; Chor viril baselgia Falera: Manfred Darms, Kurt Suter; Chor viril Lumnezia: Oscar Caduff, Domenic Bandli.
Dus dirigents meriteivels
Uonn ha il District da cant Surselva saviu undrar ina dirigent ed in dirigent che s’engaschan dapi decennis pil cant da chors. La dirigenta ei Ursula Kobler da Flond. Il parsura dalla cumissiun da musica dil DCS, Albert Spescha, ha fatg la laudatio per ella. Gia sco matta da 21 onns seigi ella entrada el chor baselgia da Gams. Strusch secasada en Surselva ils onns 1990, eis ella entrada el Chor mischedau dalla Surselva ed el Chor mischedau da Flond. Igl onn 2000 ha ella surpriu la bitgetta dil Chor mischedau da Surcuolm. Cu quel ei sesligiaus ha ella entschiet a direger l’Uniun da cant Vuorz ed avon diesch onns ha ella surpriu il Chor mischedau da Flond. «Siu engaschi pils chors da nos vitgs ei admirabels. Ursula anfla adina las dretgas canzuns per ses chors e sustegn aschia grondiusamein la curltura cantica romontscha da nossa regiun», ha Albert Spescha getg ell’undrientscha per 25 onns dirigenta.
Dapi igl onn 2006 exista il Chor mischedau Uvriu Danis/Tavanasa. Daniel Pally ha surpriu la direcziun da quel, in post ch’el occupescha entochen oz. El ei staus confundatur da quei chor e s’engascha dapi ussa 20 onns per quel. Il president dalla cumissiun da musica dil DCS ha undrau el cun entgins plaids da renconuschientscha. Nundumbreivels exercezis da cant hagi il dirigent Daniel fatg tut quels onns. El hagi embelliu survetschs divins festivs, dau concerts sacrals e profans, sco era adina puspei priu part da fiastas da cant regiunalas, cantunalas e federalas. «Quellas activitads ein mussament avunda per Tiu grond engaschi pil cant en nossa Surselva e muossa bein avunda che tiu chor viva e vul viver», ha Albert Spescha getg ell’undrientscha per Daniel Pally. Quel ha surpriu avon in onn il presidi dil District da cant Surselva. Per ses merets ha el retschiert la tabla da renconuschientscha cugl emblem dalla clav da notas.
Gust da leger dapli?