«Tenor nies manegiar ei la votaziun stada correcta»

Dumengia, ils 8 da mars 2026 ha il suveran da Mustér acceptau la realisaziun d’in niev parc da giugs e moviment cun center d’acrobatica sigl areal dil Center Fontauna. Cun 596 GIE encunter 322 NA ha el concediu il dretg da baghegiar la halla allas Pendicularas Mustér SA ed il medem mument relaschau a lezzas in deivet dad 1,75 milliuns francs. Encunter quella votaziun ha il convischin Stefan M. Seydel inoltrau in recuors concernent il dretg da vuschar alla Dertgira superiura dil cantun Grischun. Succediu ei quei ils 9 da fevrer 2026 ladinamein suenter ch’il messadi ei staus publics.

Mischeida da decisiuns

En sia argumentaziun alla Dertgira superiura dil cantun Grischun scriva Stefan M. Seydel: «Il project da votaziun cunterfa als principis fundamentals dall’unitad dalla materia. Quels principis pretendan ch’il project da votaziun ha in connex unit ed objectiv. El astga buca vegnir cumbinaus cun fatgs jasters.» Tenor Stefan M. Seydel mischeida il project da votaziun differentas decisiuns: il relasch d’in emprest dalla vischnaunca ell’altezia dad 1,75 milliuns francs, il conclus d’in dretg da baghegiar sigl areal Center Fontauna ed il project concret d’ina part da giugs e moviment cun center d’acrobatica. Medemamein contesta siu recuors damondas aviartas pertuccont il menaschi sco era la responsabladad finanziala d’in indrez da sport menaus ni incorporaus en in’infrastructura dalla vischnaunca. En quei connex numna Stefan M. Seydel ils cuosts, il manteniment, in eventual deficit ni ina cumpetenza per quei menaschi.

Saviu dir u GIE ni NA

En siu recuors alla Dertgira superiura dil cantun Grischun constatescha Stefan M. Seydel che las differentas parts dil project stettien da principi en differentas cumpetenzas da decisiun. Quellas stoppien vegnir giudicadas ton dil dretg sco dalla vart politica: «Enten resumar tut quellas decisiuns en ina suletta damonda cun GIE ni NA, ei il votant vegnius sfurzaus d’acceptar ni renviar differents interess. Cheutras vegn il liber meini dil votant engrevegiaus.» Per quei motiv constatescha Stefan M. Seydel che la formaziun dalla materia ei violada e che la votaziun dils 8 da mars 2026 ha da vegnir abolida.

«Jeu sun buca encunter la halla»

Sco Stefan M. Seydel ha detg sin damonda dalla FMR, seigi el buca encunter la halla: «Ei va buca per lezza, mobein encunter la mischeida da decisiuns. Medemamein eis ei da far in’enzenna da damonda davart il relasch dil deivet. Spel dretg da baghegiar ha il suveran giu da decider, schebein ils daners da quei deivet duein vegnir impundi autramein.» In milliun da quei deivet dad 1,75 milliuns francs duei flessegiar sco contribuziun a fonds perdu ella halla, tschels 750 000 francs sco cumpart per la Golden Card. En damonda tschenta Stefan M. Seydel era il maletg sil frontispezi dil messadi da votaziun: «Tgei ha ina foto d’ina ruschnera da far cun quei project?»

Vischnaunca ha priu posiziun

La Dertgira superiura dil cantun Grischun ha dau la caschun alla vischnaunca da Mustér da prender posiziun sil recuors da Stefan M. Seydel. Sco il meinafatschenta dalla vischnaunca, Roland Cajacob, ha detg alla FMR, ei la votaziun stada correcta aschia: «El contract da baghegiar eis ei stipulau che la vischnaunca relaschi il deivet dad 1,75 milliuns francs. Consequentamein savein nus buca sparter quellas duas fatschentas.» Suenter ch’il recuors seigi vegnius inoltraus e la vischnaunca hagi survegniu la caschun da s’exprimer, seigi igl agir vegnius sclarius giuridicamein: «Ils giurists ein claramein dil meini che la votaziun seigi correcta aschia.» Sch’il relasch dil deivet fussi buca staus stipulaus el contract pil dretg da baghegiar, fussi l’approbaziun dil dretg da baghegiar stada en cumpetenza dil cussegl da vischnaunca. «Nus essan perschuadi dalla votaziun e consequentamein vegnin nus era a cuntinuar culla fatschenta», di Roland Cajacob. Il recuors ha giu negin effect suspensiv, vul dir ch’el havess saviu impedir la votaziun.