La via per la baselgia d’autostrada resta crappusa

Il project d’ina baselgia d’autostrada dals architects da renum Herzog & de Meuron è vegnì preschentà per l’emprima giada avant prest nov onns. La visiun era stada gia quella giada detg particulara e spectaculara: ina sort «pausadi per l’olma» sin la ruta d’autostrada tras la Val Schons, tranter il San Bernardino e la Viamala.

Ma la realisaziun da questa baselgia d’autostrada ad Andeer è sa manifestada sco detg cumplitgada. In problem central resta la finanziaziun. Ils iniziants e las iniziantas emprovan dapi onns da rimnar ils radund 7 milliuns francs per realisar la baselgia sezza, sco era l’access ed il parcadi. Fin ussa saja garantida mo la mesadad da l’import, ha ditg Martin Cantieni, il vicepresident da la Fundaziun Baselgia d’autostrada Andeer, sin dumonda dad RTR.

Progress politic

La radunanza communala d’Andeer ha approvà l’october passà la revisiun da la planisaziun locala. Questa cumpiglia era la midada da la parcella, nua che la baselgia duess vegnir construida. Anc adina datti però quatter recurs da planisaziun ch’èn pendents, sco ch’il president da vischnanca, Silvio Kunfermann, ha explitgà sin dumonda dad RTR. Dus da quels recurs na sa refereschian betg directamain a la baselgia, mabain a l’access previs.

Planisà è numnadamain in parcadi tar la sortida da Balamburtg. Davent da là duessi dar in trutg fin tar la baselgia. Ils possessurs dal terren na vulan betg dar quel. Els crititgeschan ch’il terren agricul daventia adina pli stgars. La vischnanca d’Andeer ha proponì da cumpensar la perdita en in auter lieu. Sch’ina cunvegna gartegia, resta il mument anc avert.

La Regenza ed Andeer ston decider

Sco proxim pass avess la regenza grischuna da decider davart la revisiun da la planisaziun locala d’Andeer. En teoria pudess era vegnir fatga in’expropriaziun dal terren ch’i dovra per realisar il trutg. Quai va però mo, sch’igl exista in interess public. E sche la baselgia è propi d’interess public, quai resta dispitaivel. Ultra da quai sto era la radunanza communala d’Andeer decider da nov: L’avrigl decida ella, sch’ella metta vinavant a disposiziun il terren necessari per construir la baselgia. La lubientscha da bajegiar è numnadamain scadida ils 31 da december 2025. Malgrà la via crappusa vulan ils iniziants e las iniziantas persequitar vinavant il project, sco che Martin Cantieni ha sincerà envers RTR. Ch’els veglian empruvar da rimnar ils 3,5 milliuns francs che mancan ed uschia finanziar la baselgia d’autostrada d’Andeer.