«Miu liug preferiu» – exposiziun da fotos ella claustra

«L’exposiziun cun fotos persunalas muossa la diversitad da Mustér. Ella vegn arranschada el rom dall’jamna naziunala encunter rassissem dils 16 entochen ils 22 da mars 2026», scriva la Crusch Cotschna Svizra Grischun en ina communicaziun als mieds da massa. Persunas indigenas, niev arrivadas en vischnaunca e fugitivs ein vegni fotografai en lur loghens preferi. Ils maletgs ha la fotografa Dorothee Pujol fatg. En cuorts texts raquentan las persunas portretadas pertgei che quels loghens ein per ellas aschi specials. Aschia ei vegnida scaffida ina collecziun impressiunonta che muossa ton loghens familiars sco era loghens surprendents dalla vischnaunca.

Caschun da s’entupar

L’exposiziun muossa che las habitontas ed ils habitonts da Mustér han in plaz en vischnaunca e porscha aschia ina caschun da s’inscuntrar e discuorer. «La finamira dall’exposiziun ei da dar in accent visibel alla diversitad, il respect e la solidaritad en vischnaunca», scriva la Crusch Cotschna Svizra Grischun. La vernissascha dall’exposiziun cun fotos ei mesjamna, ils 18 da mars 2026 allas 19.00 ella claustra a Mustér. L’exposiziun ei aviarta entochen dumengia, ils 12 d’avrel 2026. Ella ei da veser el zuler dalla claustra.