Surses fò dus pass anavant

Avant dus onns ò la Center da Sanadad Savognin SA (CeSa) infurmo igl sies acziunari principal, igl cumegn da Surses, davart la situaziun finanziala precara. Treis seiras d’infurmaziun, ena iniziativa e ples conclus communals pi tard para igl CeSa d’aveir catto ena veia or dallas strètgas finanzialas – graztga agl sustign digl cumegn. Igl crap da fundamaint ò la radunanza communala mess glindesde seira cun approvar la cunvigna da prestaziun tranter CeSa e cumegn. Tar la votaziun ainten la Sala Grava a Savognin on 158 votantas e votants detg GEA ed angal dus NA alla schliaziun proponeida per mantigneir igl provedimaint da sanadad ainten la val.

La decisiun dalla radunanza communala monta numnadamaintg tg’igl CeSa pò chintar cun ena contribuziun annuala digl cumegn da 500 000 francs e chegl aglmanc per igls proxims set onns. La cunvigna da prestaziun pò neir disdetga igl pi bod per igls 31 da december 2032. Scu tg’igl commember digl cunsegl administrativ digl CeSa, Patric Vincenz ò accentuo, è igl paiamaint dantant plafuno: «Tenor artetgel 8 dalla cunvigna paia igl cumegn angal, schi la liquiditad digl Center da Sanadad è sot 2,5 milliuns francs.» Scu referenza vala mintgamai igl chint annual per igls 31 da december.

«En bel segn»

En grond surlievtg è sto igl GEA dalla radunanza communala per Luzi Thomann. Igl president digl cunsegl administrativ digl CeSa ò accentuo l’impurtanza dalla cunvigna da prestaziun cunzont an connex cun la siertad da pudeir planisar a lunga vista. «Ia sung extrem cuntaint. En resultat schi cler vaia betg spitgia. Igl è en bel segn dalla populaziun er anvers igl persunal», ò detg Luzi Thomann siva la radunanza anvers la FMR. Igl cler GEA mutivescha el scu er l’antiera squadra digl CeSa.

Gronda cuntantientscha n’ò dantant betg exprimia angal Luzi Thomann, mabagn er Guido Luzio. Scu cuniniziant ed amprem sottascretg dall’iniziativa per mantigneir igl provedimaint da sanadad an Surses ò el annunztgia siva igl GEA dalla radunanza: «L’iniziativa è retratga.»

100 anstagl da 42 suloms da biagier

Cun en cler GEA ò la radunanza approvo pinavant er la sagonda tractanda, la revisiun totala dalla planisaziun locala. Malgro ples dumondas e discussiuns ò igl pachet cun la lescha da biagier ed igls differents plans da zonas e plans generals catto approvaziun cun 134 cunter 8 vouschs. Previsiblamaintg igl avregl vign la revisiun totala alloura exponeida per eventuals recurs. Davart chels decida la Regenza tgi stò la fegn finala er approvar la revisiun. Chesta procedura pretenda anfignen passa en onn, scu chegl tg’igl planisader digl territori Toni Broder ò detg alla radunanza communala.

Surses redutgescha, ma crescha

Tenor igls plans approvos glindesde seira sa redutgescha igl domber da parcellas da biagier  an Surses da 251 sen 100. Igl è ena reducziun considerabla da var 14 sen 9 ha. Scu chegl tgi Toni Broder ò detg, resta dantant tuttegna ena bunga reserva: «Igl cumegn da Surses ò igl dretg da minimalmaintg angal 42 suloms da biagier. Nous planisagn damai cun daple tg’igl dobel. E chellas parcellas tanschan per passa 200 novas abitantas ed abitants.»

Tgi igl cumegn da Surses na stò betg dezonar daple sulom da biagier, vegia da far cun igl svilup dalla populaziun. Scu chegl tgi Toni Broder ò explitgia, prognostitgeschan Confederaziun e Cantun tgi la populaziun da Surses crescha durant igls proxims 15 onns per minimalmaintg 100 abitantas ed abitants.

«Igl svilup dalla populaziun è positiv», ò detg Daniel Wasescha an chel connex. Actualmaintg dombra Surses prest 2 500 abitantas ed abitants – schi blers scu siva la fegn digls onns 90 betg ple. Cuntaint n’è igl mastral dantant betg angal cun igl svilup dalla populaziun, mabagn er cun la radunanza communala an general. «Nous vagn concludia chesta seira dus fatschentas impurtantas», ò el detg anvers la FMR. Igl cumegn da Surses ò publitgia la cunvigna da prestaziun cun igl Center da Sanadad scu er igl messadi davart la revisiun dalla planisaziun locala cun daple detagls sen la sia pagina d’internet.