Quasi neginas parcellas vegnan exzonadas
Bunas novas dalla planisaziun locala dad Ilanz/Glion: La suprastonza communala communichescha che tenor il stan dad oz stoppien mo paucas parcellas da baghegiar vegnir exzonadas. Contribuiu a quella viulta hagi la prognosa positiva dalla Confederaziun e dil Cantun cun in augment dalla populaziun il 2025. La planisaziun locala vegn ussa surluvrada ed ei dat ina secunda exposiziun publica dalla revisiun.
«Quei ein daveras bunas novas per nossa vischnaunca», di Andreas Pfister, il menader da planisaziun e construcziun dad Ilanz/Glion. «Las prognosas da Confederaziun e Cantun predian in pulit augment dalla populaziun en vischnaunca.» Quei munti ch’ei vegni a dar quasi neginas exzonadas da surfatschas da construcziun.
L’historia
Il fevrer 2020 ha la populaziun dad Ilanz/Glion approbau l’emprema fasa dalla revisiun dil plan da zonas. In onn e miez pli tard ha la regenza grischuna approbau quella planisaziun. Sco quei che Andreas Pfister di, seigi ei iu leu surtut per harmonisar las zonas da baghegiar e per unificar la lescha da baghegiar. El decuors digl onn 2021 ei il maletg empalont dil spazi vegnius elaboraus e silsuenter ei la vischnaunca semessa vidlunder da reveder la planisaziun locala, quei vul dir da dimensiunar las surfatschas da construcziun tenor il diember da habitontas e habitonts e d’adattar la planisaziun al maletg empalont dil spazi.
Zonas memia grondas
Igl emprem temps dalla planisaziun locala seigi ins partius dil fatg che las zonas da baghegiar seigien bia memia grondas e stoppien vegnir redimensiunadas considerablamein, di il menader da planisaziun e construcziun dad Ilanz/Glion. «Da lezzas uras supponevan ins che rodund 150 parcellas stoppien vegnir exzonadas. Quei ei lu era stau il cuntegn dall’emprema exposiziun publica da cooperaziun che ha giu liug la fin da 2024.» En consequenza da quella publicaziun hagi ei dau numerusas reacziuns da possessurs da terren ch’erien buca cuntents cun las exzonaziuns.
La viulta
Sco quei ch’il vicepresident da vischnaunca Martin Capeder di enviers la FMR hagi la vischnaunca el decuors dil 2025 survegniu dalla Confederaziun e dil Cantun ina nova prognosa davart il svilup dalla populaziun. «Quella ei curdada ora bia pli positiva che spitgau.» Aschia seigi la pressiun da stuer reducir las zonas da baghegiar stada bia pli moderada. Igl uffeci da baghegiar da Ilanz/Glion confirmescha che tenor il stan actual dalla planisaziun locala resti la gronda part dil terren da construcziun vinavon ella zona da baghegiar.
Nova procedura necessaria
Il vicepresident Martin Capeder di che la suprastonza communala hagi priu enconuschientscha dallas novitads positivas e schau surluvrar da niev la planisaziun locala. Damai che la planisaziun vegni midada aschi marcantamein, eis ein necessari da far ina secunda procedura da cooperaziun. Tenor Andreas Pfister digl uffeci da construcziun vegn quella a haver liug naven dalla fin da mars entochen la fin d’avrel 2026. La zona da planisaziun seigi vegnida prolunganida entochen igl onn 2028. (mira box). «Per informar pli detagliadamein nossa populaziun eis ei previu da far ina sera d’informaziun per tut tgi che ha interess.» Quella sera vegn a haver liug la fin da mars ell’aula dalla scola a Glion.
Zona da planisaziun Ilanz/Glion
Damai che la procedura da planisaziun locala ei aunc buca terminada, ei la zona da planisaziun dalla vischnaunca Ilanz/Glion ch’ei vegnida relaschada gia igl onn 2018 vegnida prolungida aunc inaga per dus onns entochen il fevrer 2028. Tenor l’informaziun dad Andreas Pfister, menader da planisaziun e construcziun dad Ilanz/Glion, vegn quella zona da planisaziun aunc inagada adattada sil stan actual suenter la procedura da cooperaziun che stat avon porta. «Il termin dalla zona da planisaziun vegn buc extendius, el vala denton vinavon entochen il fevrer 2028.» Duront quei temps valien per aschi da dir duas leschas, la lescha da baghegiar veglia sco era las perscripziuns novas dil plan da zonas. (fmr/mg)
Gust da leger dapli?