Var duas milliardas per abitaziuns pajablas

Igl è ina simpla chaussa, ma il pled rumantsch tuna nunditg cumplitgà: construcziun d’abitaziuns d’utilitad publica. Per tudestg è l’expressiun in zichel pli chapaivla, l’uschenumnà «gemeinnnütziger Wohnungsbau».

Davos l’expressiun stat ina simpla idea: Nagin na duai sgramar profits cun affittar abitaziuns. E perquai che nagin n’incassa profits u gudogns, èn abitaziuns d’utilitad publica a lunga vista pli favuraivlas che autras.

Cooperativas – ma era privats u societads – fabritgeschan talas abitaziuns e duain ils proxims onns survegnir vinavant emprests favuraivels. Il Cussegl naziunal ha approvà il mardi in ulteriur credit d’impegn dad 1,92 milliardas francs fin il 2033. En pli vegn il «Fonds de Roulement» alimentà cun ina pli auta summa, numnadamain 150 milliuns francs annualmain dal 2030 fin il 2034.

Protesta da la PPS

Betg tuts èn stads intgantads. La PPS ha fatg la proposta da betg entrar en materia. «Pertge discurrin nus oz davart questa fatschenta? Tge è l’elefant en la stanza? L’elefant è l’immigraziun nuncontrollada», ha ditg Pamini Paolo sco pledader da la PPS. La Svizra vegnia betunada en cun bajetgs ed entras daners da promoziun vegnia fabritgà en ils lieus sbagliads.

Il zercladur voteschia la Svizra davart l’iniziativa «Nagina Svizra da 10 milliuns», ha ditg il cusseglier tessinais. Pir suenter questa votaziun duai il parlament decider. I na fetschia betg senn da gia ussa fixar las mesiras per ils proxims onns. La PPS è però stada la suletta fracziun che ha cumbattì las duas fatschentas.

Pretensiuns pli autas da la PS e Verda

L’ala sanestra e verda han proponì da conceder dapli daners, numnadamain 300 milliuns annualmain per il «Fonds de Roulement» e 2,3 milliardas per il credit d’impegn.

Jacqueline Badran da la PS ha fatg attent ch’i saja ina incumbensa da la Confederaziun da promover abitaziuns d’utilitad publica. Tenor la constituziun stuess la cumpart da talas abitaziuns atgnamain crescher. «Ma la cumpart da purtader da chasas d’abitar d’utilitad publica stagnescha dapi decennis tar 4 %», ha la cussegliera turitgaisa ditg. La Confederaziun promovia gia daditg abitaziuns pajablas cun emprests «senza che quai ha custà insatge», ha ditg Franziska Ryser dals Verds. Tuts emprests sajan adina vegnids pajads enavos, dapi ch’il sustegniment da la Confederaziun existia. Las propostas da metter a disposiziun dapli daners èn vegnidas refusadas cleramain dal Cussegl naziunal. Sco proxim decida il Cussegl dals chantuns davart las duas fatschentas.