Quatter dumondas a Reto Martinelli
Reto Martinelli, oriund da Strada en l’Engiadina Bassa, lavura tar «Wohnen Schweiz». L’organisaziun cusseglia ses commembers en l’entira Svizra co fabritgar e finanziar abitaziuns pajablas. La FMR ha vulì savair tge ch'el pensa da la decisiun dal mardi dal Cussegl naziunal appartegnent il Fonds de Roulement per emprests da construir d'abitaziuns d'utilitad publica.
FMR: Tge munta la decisiun dal Cussegl naziunal per Vossa organisaziun «Wohnen Schweiz»?
Reto Martinelli: Igl è in signal fitg ferm per la promoziun dad abitaziuns pajablas. Ils daners dattan ina tscherta segirezza per sustegnair dapli projects. Er il Grischun è en ina situaziun ch’i dovra dapli abitaziuns pajablas. Il «Fonds de Roulement» è l’instrument per pussibilitar quai a glieud u ad organisaziuns u a vischnancas che vulan fabritgar talas abitaziuns.
Co gida Vossa organisaziun?
I dat duas federaziuns da tetg per construir abitaziuns d’utilitad publica. Nus essan ina da questas organisaziuns da tetg per organisaziuns che vulan construir abitaziuns pajablas. Quai pon esser cooperativas, fundaziuns u societads che n’èn betg orientadas al gudogn. Nus gidain maun en maun a sviluppar l’organisaziun. Lura cussegliain nus co realisar projects per abitaziuns pajablas, ma era la finanziaziun e cuntinuaziun.
Tge impurtanza ha il «Fonds de Roulement» per il Grischun?
Il Grischun ha mess en vigur quest onn la nova lescha da promover abitaziuns. Lezza ha il medem mecanissem sco il «Fonds de Roulement». Vul dir: Sch’in project survegn in emprest dals fond naziunal, lura metta il Grischun a disposiziun il medem import d’emprest.
Quantas cooperativas u organisaziuns sustegna «Wohnen Schweiz» en il Grischun?
Nus avain var diesch organisaziuns che vulan u han gia realisà agens projects en il Grischun. Lura cussegliain nus diversas vischnancas sco era Klosters u Arosa che cumenzan a metter en pe ina strategia per abitaziuns pajablas. Per il mument datti era projects sco per exempel a Segl u a Ftan che fissan pronts e survegnissan ils emprests, ma las permissiuns da fabritgar vegnan bloccadas cun recurs.
Gust da leger dapli?