Las stentas sepagan

«Nus lein esser pli presents, era ellas medias socialas. En quei connex lein nus plidentar surtut quellas e quels che fan turas da skis senza vuler concurrenzar. La Trofea Péz Ault duei esser in arranschament per mintgina e mintgin da quei sport d’unviern.» Quei ha il president dil comité d’organisaziun dalla Trofea Péz Ault, Giochen Bearth, detg miez schaner alla FMR. La finamira dil comité ei stada quella da nezegiar il giubileum dalla 15avla trofea per far sforzs supplementars per augmentar il diember da participontas e participonts.

Gia 160 annunzias

Strusch dus meins pli tard constatescha Giochen Bearth: «Las stentas dalla communicaziun, dil marketing e d’esser pli presents ellas medias socialas paran da haver success.» Entochen il mardis da miezdi eran gia 160 skiunzas e skiunzs da turas s’annunziai per la cuorsa principala da dumengia proxima. Tschun dis avon la trofea ein quei rodund 20 % dapli annunzias ch’ils onns precedents. Giochen Bearth quenta silmeins aunc cun 20 che s’annunzian ils proxims dis. Ton per la cuorsa verticala la sonda sco per l’individuala la dumengia eis ei pusseivel da s’annunziar entochen cuort avon la partenza.

Effect dils Giugs olimpics?

Savess quella buna participaziun era esser in effect dils Giugs olimpics, nua che concurrenzas da turas cun skis ein stai uonn per l’emprema ga sil program? «Quei ei grev da dir, mo ei pudess esser», di Giochen Bearth. Perencunter eis el buca cuntents cun l’autra finamira, quella da plidentar pli biaras concurrentas e pli biars concurrents dalla regiun che fan turas per passatemps: «Deplorablamein resta quei diember plitost pigns. Forsa ch’in ni l’auter sedecida aunc da separticipar la fin d’jamna.»

Concurrents da biaras tiaras

La Trofea Péz Ault a Mustér quenta era uonn pil Swiss Cup da turas da skis. Consequentamein ein biaras concurrentas e biars concurrents ferms dalla Svizra dalla partida. Mo buca mo quei. «Alla partenza la fin d’jamna ein sportistas e sportists era dalla Frontscha, Italia, Germania, Spagna, Svezia e Pologna, mo era da l’autra vart dalla mar, dils Stadis Uni dall’America e dil Canada. Quella buna participaziun internaziunala ei buna per nus e secapescha era per la destinaziun.» Gia s’annunziai per la concurrenza individuala da dumengia proxima ein il victur digl onn vargau, il Svizzer Fabien Murisier, ed il secund, igl Austriac Wolfgang Hofer. «L’jamna vargada han ils campiunadis europès giu liug e per quei motiv eis ei bein pusseivel ch’in ni l’auter dils ferms sedecida il davos mument da separticipar», spera Giochen Bearth.

Bunas cundiziuns

«Nus havein priu bugen la neiv d’avon rodund treis jamnas. Las cundiziuns ein bunas el territori, surtut per la concurrenza dalla dumengia», constatescha Giochen Bearth che presidiescha il comité d’organisaziun dalla Trofea Péz Ault dapi igl onn 2018. Perencunter vegnan las concurrentas ed ils concurrents dalla cuorsa verticala dalla sonda a stuer absolver igl emprem tschancun a pei. La partenza da quella cuorsa ei a S. Catrina. «Quei ei stau il cass era ils davos onns ed era ad autras concurrenzas da turas ei quei buca zatgei extraordinari.» Tenor las prognosas actualas duess l’aura esser variabla sonda e dumengia, mo Giochen Bearth manegia: «Nus essan resistents.»