Manevers e stortas ella Fermata
La Societad da musica da Falera ha envidau la davosa fin d’jamna a siu concert annual. Igl ei stau il 19avel cul dirigent Duri Cathomen. El e sia «scuderia» han menau gl’auditori sin pistas internaziunalas dalla F1. Dapertut han tuns sonors – e buca fried da benzin e canera – accumpignau la sentupada.
12 pistas dalla Formula 1 han ins giu caschun d’emprender d’enconuscher sonda e dumengia vargada. Tons tocs ha la musica sunau al concert. Ils amaturs dalla classa superiura dil sport d’autos pon haver enconuschiu finadina pista dalla F1. Tgi che s’interessescha per quella disciplina po saver nua che la megliera storta ei, nua ch’ei dat ils manevers pli spectaculars e nua che la pli gronda culissa d’aspectaturs ei. Mintga pista dalla Formula 1 dil mund ei individuala. Aschia ein era ils tocs stai che la Societad da musica da Falera ha sunau. La davosa fin d’jamna ha ella envidau a siu concert annual.
Viagiond da pista tier pista
A quei concert han ins buc udiu – conform alla F1 – canera da motors. Quella specia da «musica» ha muncau. Ins ha era buca ferdau benzin ed era buca gummi barschau da pneus isai. Da manevers da vargar buca da tschintschar, tals ha il schef dalla «Scudaria Falera», Duri Cathomen, buca lubiu. Giu dalla tribuna d’aspectaturs ed ella sala dalla Fermata a Falera han ins tuttina astgau sentir l’atmosfera dalla F1. La formaziun musicala ha denton divertiu cun tuns bials, cumpleins e harmonics. Ella ha menau d’ina tiara all’autra, aschia sco il menaschi dalla F1 viagia mintg’onn d’in continent a tschel, da cuorsa tier cuorsa.
La presidenta dalla societad, Irina Carvalho, ha beneventau gl’auditori en num da ses 34 conmusicantas e conmusicants. Igl ein 20 dunnas e 15 umens che sunan els differents registers dalla formaziun da brass. Avon 19 onns ha Duri Cathomen surpriu la bitgetta. El ha sviluppau la qualitad musicala che ha daferton contonschiu in livel respectabel. Da quei ha gl’auditori saviu seperschuader all’entschatta tiel toc d’entrada «Formula One», in arranschament dil Vallesan Bertrand Moren.
«Arkansas», il toc da pag per Bienna
Puspei han ils da Falera dedicau ina tematica a lur concert annual. In onn ei musica dils Celts stada el center, in onn eis ei stau l’Italia ed in auter ha gl’auditori entupau las figuras dil Disneyland. Il concert 2026 ha giu la tematica «Formula 1». Duas plidadras han tgamunau tras in program. En tut ha societad da musica presentau 12 tocs da diversas tiaras e culturas. Las plidadras han presentau mintgamai ina pista dalla F1. Aschia han ins astgau gider – cun interrupziun d’in «Boxenstopp» respectiv d’ina pausa – tocs musicals da Spa/Belgia, Silverstone/Engheltiara, Budapest, Monaco. Ina sequenza ha mussau il Red Bull Ring ell’Austria, in’autra la circulara da Miami els Stadis Uni ed in’autra puspei da cuorsa dils motors el desiert dad Abu Dhabi.
Tuns plein fiug han resunau cul toc «El es el senor» dil Mexico. Cun «Arkansas» ha la musica schau tedlar ina cumposiziun da Jacob De Haan. Cun quei toc separticipescha la musica da Falera alla fiasta federala da musica dils 14-17 da matg 2026 a Bienna. Il toc en pliras parts includa passaschas poeticas che pretendan flad, autras ein spertas nua che musicantas e musicants ston dumignar la tecnica da sunar. Viers la fin dil concert eis ei vegniu aunc meglier: Duri Cathomen e sia truppa han interpretau la part cugl allegro vivace ord l’ouvertura dall’opera Guglielmo Tell da Gioacchino Rossini. Cun quei toc ei la squadra «gallopada» – pil grond plascher digl auditori – silla pista da Monza.
Per la fin haveva la «Scudaria Falera» spargnau in supplement special. Gl’auditori ha sblatschau freneticamein pils tuns dil carneval da Rio. In detg finale cun temperament e fiug sidamerican per la cuorsa ella Brasilia. Il punct cul motto dil concert.
Gust da leger dapli?