«Oz schess miu fegl quei forsa buc aschia»
Avon biebein in onn han bab Martin e fegl Nils Cavegn lantschau in discuors denter las generaziuns sco podcast. Ina expressiun che pertucca la peina da mort che Nils Cavegn ha fatg en ina contribuziun dil december vargau ha caschunau reacziuns. Via RTR ha Martin Cavegn priu posiziun la jamna vargada davart il podcast e sia rolla sco president communal.
Duas generaziuns, duas perspectivas, ina finamira communabla. Sut quella enzenna han il president communal da Tujetsch Martin Cavegn e siu fegl Nils Cavegn da Sedrun lantschau il mars 2025 lur podcast che senumna «Discuors denter las generaziuns». Las tematicas che Martin e Nils Cavegn plidentan en lur podcast, per regla ina ga per meins, ein vastas e tonscha dils prighels da social media per la giuventetgna sur Papa Franzestg entochen educaziun, vacanzas ni luvrar entochen 70. Magari plidentan bab e fegl Cavegn era temas politics, denton buca forsa tematicas sursilvanas. Sche Martin e Nils Cavegn tschontschan da politica, han els las sfidas europeicas en egl. Gia il fatg che bab e fegl tschontschan tudestg da scartira e che la preschientscha visuala ella reit cun il simbol davos dies che regorda al Matterhorn lai supponer ch’els vulan derasar lur vesta dil mund lunsch sur il cunfin tuatschin e grischun.
La reit sco fontauna dalla verdad
In discuors digl uost 2025 porta il tetel «Europa al precipezi e tut mira tier». En quella contribuziun fan ins spert persenn che principalmein Nils Cavegn ei dil meini che las tiaras dil vest mondien sut pervia dalla immigraziun. «Deutschland ist verloren», ei ina dallas conclusiuns ch’il fegl Cavegn trai en quei podcast. El tschontscha da grondas demonstraziuns encunter l’immigraziun dalla stad 2025 ch’anflien negina menziun ellas medias tradiziunalas. L’entschatta december han bab e fegl Cavegn dau il tetel a lur discuors «Gir la verdad per tut prezi egal tgei ch’ei cuosta». La verdad vegn per Nils Cavegn buca dallas medias tradiziunalas, mobein dad aschinumnai reals, filmins derasai ella reit. Nils Cavegn tematisescha in cass ch’ei, tenor sias indicaziuns, succedius a Roma nua ch’in um oriunds dall’Africa ha violau ina dunna taliana e dus auters han sfurzau igl amitg dalla dunna da mirar tier. La conclusiun da Nils Cavegn fatga el podcast: «Talas persunas ston ins abolir, executar publicamein.»
In placat anonim
La contribuziun e l’expressiun ei buca stada senza reacziuns. Sco emprem han persunas nunenconuschentas pendiu placats ella vischnaunca da Tujetsch e fatg attent alla contribuziun. Las explicaziuns da Nils Cavegn pertuccont la peina da mort han era anflau la via ellas medias. L’entschatta fevrer ha ina contribuziun dalla Südostschweiz tematisau las explicaziuns dil podcast e pli tard ei il podcast era stau tema en 20 Minuten e Watson. En quellas contribuziuns ha Nils Cavegn relativau sia explicaziun e getg ch’el vegli buca reintroducir la peina da mort. Pervia dils rapports medials che bab e fegl Cavegn valeteschan per tendenzius han els annunziau da buca pli discuorer cun las medias. Las medias tradiziunalas representan, tenor l’opiniun da Nils Cavegn, unicamein la vesta dil stadi ni da gruppas d’interess.
Via lur podcast tschontschan Martin e Nils Cavegn tuttavia cun la publicitad ed aschia era indirectamein cun las medias. Per exempel en ina contribuziun dils 16 da fevrer 2026, nua che bab e fegl prendan posiziun davart quei ch’ei curriu e passau e co las medias han rapportau tenor lur vesta davart il podcast. Leu relativescha Nils Cavegn sias explicaziuns davart la peina da mort: «Jeu vai atgnamein vuliu gir che tals delinquents vegnien strufegiai memia pauc.» Nils Cavegn fa attent da buca differenziar denter persunas indigenas e quellas digl exteriur. «Ei dat buns e schliats carstgauns.» Ed el gi denter auter che siu patertgar sebasi sin sia cardientscha cristiana. Il grond sbagl vesan bab e fegl denton buc tier sesez, mobein els rapports dallas medias che hagien interpretau tenor agen gust las posiziuns ch’els hagien priu viers las medias. «Il meglier eis ei da buca tschintschar cun medias.»
Martin Cavegn pren posiziun
Viers RTR ei Martin Cavegn lu tuttina aunc s’exprimius la jamna vargada e, sco quei che RTR scriva, perquei ch’el ei president communal dalla vischnaunca da Tujetsch ed entras quei uffeci obligaus da prender posiziun. «Oz schess miu fegl quei forsa buc en quella moda e maniera.» E Martin Cavegn accentuescha ch’ei seigi da far ina differenza da quei che siu fegl hagi getg e quei ch’el hagi getg en quei podcast. «Igl ei vegniu interpretau aschia che jeu sco bab e president communal sustegni remarcas che miu fegl ha fatg e quei ei buc aschia.»
El podcast dils 16 da fevrer 2026 fan bab e fegl Cavegn attent da haver retschiert dabia reacziuns positivas, sper singulas negativas, sin lur discuors da generaziuns. Il podcast retscheivi dapi ils rapports ella medias era dapli attenziun. «Nies podcast ha segir buca pitiu.» Buca da sesmarvigliar che bab e fegl Cavegn cuntinueschan. Per enzatgei auter han ei denton insumma negina capientscha, sco els lain saver via lur discuors: Numnadamein che lur podcast ei staus tema dil tscheiver tuatschin.
Gust da leger dapli?