Refusau alla suprastonza

In onn suenter che la radunonza communala da Trin ha approbau ina fatschenta, ha ella stuiu tractar danovamein quella: Mesjamna sera ha la radunonza approbau cun gronda maioritad ina proposta ord il ravugl dils presents da refusar il project alla suprastonza. Quella duei examinar e surluvrar il project ella valeta da 395’000 francs per sanar il santeri. Ils 19 da mars 2025 haveva la radunonza communala approbau, cun 49 GIE encunter 43 NA e siat abstenziuns, il credit corrispundent. Quella decisiun ha evocau opposiziun ed ina iniziativa dil pievel. Ils 5 da zercladur 2025 ha in comite inoltrau l’iniziativa per revocar la decisiun dispiteivla. Ils 11 da december 2025 ha la radunonza communala approbau la proposta da reponderaziun cun 100 GIE encunter 39 NA. Ussa ha quella maioritad obligau puspei la suprastonza d’examinar e verificar il project da sanar il plaz el nord dalla baselgia da Trin.

Quella tractanda dispiteivla dil santeri ei stada el center dalla radunonza communala. Persuenter ha il suveran da Trin dau suatientscha alla proposta dalla suprastonza ed ha lubiu in credit da 250’000 francs per in niev vehichel communal. (fmr/abc)