«Nus scrivain ora mo per rumantsch»

A partir d’avrigl 2026 surprenda Nicolas Pernet (46) ina nova funcziun aifer la direcziun generala da la SRG SSR. El daventa «directur purschida» tar l’interpresa da medias da dretg public da la Svizra. Uschia banduna Nicolas Pernet pia suenter tschintg onns il Grischun e Radiotelevisiun Svizra Rumantscha (RTR), nua ch’el è stà a partir dal 2021 directur. Fermamain entretschà en la tscherna dad in successur u dad ina successura dal directur partent vegn ad esser Vincent Augustin. El è dad ina vart president da l’uniun purtadra SRG.R e da l’autra vart era commember dal cussegl d’administraziun da la SRG SSR (guarda boxa pertutgant proceder d’elecziun).

Nagina surpraisa per Augustin

Per Vincent Augustin, il president da la SRG.R, n’è il pass professiunal da Nicolas Pernet betg ina surpraisa, sco ch’el ha declerà questa mesemna envers RTR: «Jau hai gì plirs discurs persunals cun noss directur davart sia candidatura tar la SRG SSR. Ins na saveva natiralmain betg, sche la decisiun crodia a sia favur u betg. Ma ussa n’è la surpraisa betg uschè gronda.»

Bler temp per deplorar che Nicolas Pernet banduna RTR na stat dentant betg a disposiziun. Cunquai ch’il directur partent surprenda gia l’entschatta d’avrigl sia nov’incumbensa a Turitg, èsi da far vinavant. Gia ils proxims dis vegnia la plazza perquai scritta ora.

Inserir mo per rumantsch

Tschertgà vegnia ina persuna cun bunas abilitads da manar e che s’accordia bain cun la cultura da manaschi dad RTR. «Nus scrivain ora la plazza sapientivamain mo per rumantsch. Damai sto la persuna savair rumantsch ed avair enconuschientschas approfundadas da la lingua. Ella sto esser abla da manar in manaschi RTR che vegn dentant ad esser structurà en moda e maniera differenta dad oz – pervi dal project da transfurmaziun ‹Enavant›. La persuna sto surtut responsar la publicistica e la producziun locala e regiunala en il mund rumantsch», ha declerà Vincent Augustin.

Manar «quai ch’il public senta»

Las incumbensas da la nova directura u dal nov directur vegnan pia a sa midar. La raschun è il program da reorganisaziun e da spargnar cun il num rumantsch «Enavant». En tut sto l’entira SRG SSR spargnar 270 milliuns francs. En il futur vegnan las partiziuns da finanzas, da tecnica e da persunal perquai manadas central davent da la direcziun generala a Berna.

Quel entir process da reorganisaziun ha pia era consequenzas per il nov post directiv tar RTR, sco che Vincent Augustin ha declerà: «Il directur u la directura futura ha dentant da manar tut il rest dal manaschi, tut quai ch’il public senta la fin dals quints il pli ferm. Il public na s’interessa betg per finanzas e dumondas da persunal, mabain per la purschida che RTR realisescha per las consumentas ed ils consuments.» E qua sajan els – uschia Vincent Augustin – averts tant per chattar ina successiun interna ni era externa da Nicolas Pernet.

«I pudess er esser ina dunna»

La persuna che succeda a Nicolas Pernet al timun da RTR è automaticamain era part da la direcziun generala da la SRG SSR. Quella direcziun naziunala sa cumpona actualmain da trais dunnas e sis umens. Malgrà quel dischequiliber tranter um e dunna na vul Vincent Augustin betg exprimer preferenzas – ni per ina dunna ni per in um: «I n’è betg d’emblidar che sisum la SRG SSR stat ina directura generala, la scheffa da las resursas umanas è ina dunna, la scheffa da la communicaziun è ina dunna. Pia na datti betg mo umens en funcziuns-clav da l’interpresa. Qua tar RTR parta ussa in um, perquai po succeder in um, ma i pudess senz’auter er esser ina dunna.»

Elecziun anc avant la stad

Sco quai che Vincent Augustin ha explitgà sin dumonda, avess la persuna che succeda a Nicolas Pernet sco directura da RTR da vegnir elegida anc avant la stad. L’intenziun è da betg retardar la realisaziun dal program «Enavant».

Fin ch’il post è occupà, surprendan las quatter persunas da la direcziun dad RTR las incumbensas dal directur partent. Quel quartet furman actualmain quatter persunas sursilvanas: Corsin Gadola, schef tecnica, Flavio Bundi, schefredactur, Tamara Deflorin, scheffa communicaziun e Beat Lozza, schef servetschs centrals.