La Stiva Biala resta stiva biala

L’idea da cumbinar la Stiva biala cun sia stiva ha Urs Anton Schleiss giu la stad 2025. Lu eis el staus per l’emprema gada a Luven per mirar la Stiva Biala ch’era venala dapi il december 2024. La Stiva Biala hagi imponiu ad el e perquei hagi el naven digl emprem di suenter sia viseta a Luven luvrau vid in concept. Il resultat da quella lavur senumni MUNDURS, quei che vegli dir il mund digl Urs. Il liug central da mundurs ei il restaurant amiez Luven ch’ei sia stiva ed el medem mument era quella da ses hosps.

Cuschinau sigl entir mund

Urs Anton Schleiss deriva oriundamein dil cantun Zug. El raquenta da ses onns sco cuschinier egl exteriur. «Jeu hai luvrau plirs onns en Spagna, el Mexico, El Salvador ed els Stadis Uni dall’America. Suenter miu retuorn en Svizra hai jeu fundau ina atgna firma da catering ch’jeu haiel giu duront 25 onns.» Pli tard seigi el staus possessur d’in local da fiastas en ina anteriura cascharia, di il niev gastronom da Luven che stat cuort avon la pensiun. Avon 11 onns hagi el giu ina crisa da sanadad perquei che l’entira branscha da catering seigi semidada en disfavur dallas interpresas sco sia. Suenter sia reconvalescenza hagi el luvrau biars onns temporarmein sco cuschinier. Ed ussa selegri el d’esser a Luven cun vesta silla Foppa. El selegri era da novs contacts ch’el hagi mintga gi.

Stiva sto esser stiva

«Gia dapi in temps erel jeu sin la tscherca d’in agen menaschi», di Urs Anton Schleiss. «Tuttenina haiel jeu viu igl inserat dalla Stiva Biala a Luven. Quel ha plaschiu a mi ed jeu sun vegnius immediat a mirar.» El hagi sinaquei ponderau in concept. Ed orda sias ideas hagi ei dau il «mundurs», il mund digl Urs. «Ei ha buca duvrau grondas ponderaziuns fundamentalas. La Stiva Biala ei ina stiva e la basa ei e resta la stiva.»  Cunquei ch’el seigi ella vegliadetgna da pensiun hagi el vuliu surprender in menaschi pign ch’el sappi menar persuls ed en in pensum reduciu duront dus ni treis dis ad jamna, di Schleiss. Ils 31 da schaner eis ei stau aschi lunsch. Urs Anton Schleiss  ha envidau la populaziun da Luven ils 31 da schaner 2026 ad in aperitiv. E 90 persunas da Luven ein vegnidas. «Jeu haiel giu in plascherun», di el enviers la FMR.

Spargnar el falliu liug ei falliu

Quels plaids enconuschents neu dalla tradiziun populara cattan ins era silla pagina d’internet actuala dalla Stiva Biala a Luven. Il niev menader dalla Stiva Biala di che quella locuziun secunfetschi era cun sias experientschas orda 40 onns ella gastronomia. El sappi ord atgna experientscha che products fini domineschien en biaras casadas svizras. Tals products hagi el dil reminent era viu en casas che hagien custau plirs milliuns francs. Biara glieud spargni semplamein el falliu liug, numnadamein tier las victualias. «Jeu sai tgei che rauba da qualitad mediocra ei. Jeu haiel era gia cuschinau cun da quellas victualias. En cantinas per exempel setracta ei da porscher nutriment per glieud che lavura. Senutrir e magliar ein ein denton duas differentas caussas.»

Urs Anton Schleiss di che per illustrar prendi el adina igl exempel dils calzers ch’enzatgi porti. «Ei dat umens da fatschenta che portan vestgius fetg cars e prezius cun cravattas da seida. Da medem mument porta la medema glieud calzers da schliata qualitad che stattan buc en relaziun cun il vestgiu.» Vid ils calzers vesi ins nua che la dunna ni il signur metti las prioritads. Aschia seigi ei era cul magliar, di Urs Anton Schleiss. Sia devisa seclomi perquei: «Magliar ei dapli che mo da transportar energia e substanzas da nutriment el tgierp per mantener la veta.»

Gievgia, venderdis e sonda

La Stiva Biala ei endrizzada per la clientella che vul magliar e per la clientella che vegn a beiber in sitg alla meisa rodunda. El mument arva Urs Anton Schleiss sia Stiva Biala il venderdis e la sonda naven dallas 16.00 per la meisa rodunda e naven dallas 18.00 per hosps che vegnan a magliar. Naven digl avrel ei la stiva era aviarta la gievgia.  La populaziun da Luven ha en mintga cass documentau cun sia participaziun all’avertura, ch’ella ei satisfatga che la Stiva Biala ei puspei habitada ed aviarta.