Manuela Gebert candidescha per il presidi communal
Manuela Gebert dad Alvagni candidescha per il presidi da la vischnanca Albula/Alvra, sco successura da Daniel Albertin. Quai ha la dunna da 51 onns communitgà a la radunanza communala a Casti la gievgia saira. Actualmain è ella l’unica candidata per il presidi. L’elecziun è ils 14 da zercladur a l’urna.
Manuela Gebert, ch’è advocata, viva dapi l’onn 2019 ad Alvagni Bogn e sa sentia fitg bainvegnida en il vitg ed en la val, ha ella tradì envers RTR.
Sia motivaziun per la candidatura saja il giavisch da s’engaschar e da betg spetgar ch’insatgi auter surpiglia las incumbensas. Malgrà ch’ella n’ha nagina experientscha politica directa, ha ella – grazia a sia activitad professiunala sco advocata – blera experientscha cun la politica e cun temas politics.
Sia chanzlia d’advocatura a Berna ch’ella maina dapi l’onn 2019, mettess ella sin «flomma da spargn», per pudair dumagnar l’uffizi dal presidi communal.
Ella discurra gia in pau rumantsch
La lingua rumantscha haja ina gronda muntada per ella. Schebain ch’ella possia discurrer actualmain mo paucas frasas, chapeschia ella bain inqual chaussa, er sin fundament da sias enconuschientschas dal talian. Ses um è da lingua materna rumantscha, quai la gidia d’emprender.
Ella è gia s’annunziada tar la Lia Rumantscha per lecziuns privatas per acquistar in minimum d’enconuschientschas dal rumantsch e per pudair inscuntrar la glieud da la val en lur lingua materna. Gebert exprima respect envers la sfida da l’uffizi presidial, ma nagina tema. Ella è conscienta ch’ella po far quint cun in team existent e cun blera experientscha. Actualmain è ella l’unica candidata per il presidi. L’elecziun è ils 14 da zercladur a l’urna.
Atgnamain vuleva Daniel Albertin gia dar giu ses uffizi cun la fin 2024. Cunquai ch’i n’è lura però betg gartegià da chattar ina successiun, ha el decis il november da tuttina anc restar president communal fin ch’insatgi saja pront da surpigliar l’uffizi.
Duas demissiuns en suprastanza
Da la suprastanza communala actuala han inoltrà la demissiun Agnes Simeon e Martin Christen. Patrizia Zanini ha gia decidì ch’ella veglia candidar per in’ulteriura perioda d’uffizi. Ils auters en suprastanza n’han anc betg decidì. Sco nov candidat per la suprastanza sa metta a disposiziun Roman Brenn, ch’è stà il davos president communal da Stierva avant la fusiun. L’elecziun da la suprastanza communala è quest atun.
Renovaziun da la staziun da Casti è approvada
La radunanza communala da la vischnanca Albula/Alvra ha la gievgia saira approvà cun 43:0 vuschs in credit da radund 7 milliuns francs, per renovar la staziun da Casti.
Nova staziun per radund 42 milliuns francs
A la staziun da Casti dovri renovaziuns cumplessivas. Ils motivs per quai èn las pretensiuns legalas da la lescha davart l’egualitad da persunas cun impediments sco er las meglieraziuns da la situaziun da midar tren actuala ch’è per part malsegira. Quai ha la vischnanca descrit uschia en il messadi per la radunanza communala.
Er per ils autos da posta dovra perruns senza barrieras e spazi supplementar per novas colliaziuns – perquai sto il terminal d’autos da posta vegnir bajegià ora. La vischnanca d’Alvra è responsabla per l’infrastructura dal manaschi d’autos da posta.
L’engrondiment da la staziun che vegn planisà communablamain da la Viafier retica e da la vischnanca duai vegnir realisà tranter ils onns 2027 e 2030. Il project cumpiglia:
- renovaziun e cumplettaziun dals binaris
- dus perruns novs da 300 meters lunghezza senza barrieras
- sutpassadi per persunas cun access cuverts, stgalas e rampas
- re-construcziun dal binari da deposit
- nov terminal d’autos da posta senza barrieras, plazza da volver e parcadis per cars
- spustament dal parcadi e nov access sur la Veia Arniev
- aboliziun dal sutpassadi existent inclusiv reorganisaziun dals access per peduns
Ils custs da construcziun muntan a prest 39 milliuns francs, quai senza taglia sin la plivalur. La vischnanca porta da quai 6,9 milliuns francs.
Il december 2025 ha l’Uffizi federal da traffic concedì la permissiun da construcziun dal project. Ils novs implants da viafier duain vegnir averts il december 2029 (urari 2030), il terminal d’auto da posta l’atun 2030.
Gust da leger dapli?