Schluein Glion contonscha puspei il final dil Cup grischun

Aschi baul sco aunc strusch inagada ha la sesiun da ballapei entschiet a Crap Gries la sonda vargada avon ina biala roscha d’aspectaturas ed aspectaturs, la quala ha fatg frunt al ferm e criu vent che ha buffau duront il giug entir e purtau plievgia ed alla fin schizun scrottas da neiv. Ils giugadurs d’omisduas equipas han mussau che moviment ei in bien remiedi encunter la ferdaglia cun procurar per in’entschatta animada.

Cuera ei iu en avantatg

Gia ella sisavla minuta eis ei numnadamein gartegiau als hosps da Cuera d’ir en avantatg entras in gol da Davide Rosafio che ha astgau concluder in’attacca sur la vart seniastra cun sittar la balla cun empau cletg ella reit. Quei avantatg ha denton buca teniu gitg. Mo ina minuta pli tard ha Lars Zala sbagliau la mira mo per pauc ed aunc ina minuta pli tard ei gia l’egalisaziun gartegiada. In siet da cantun ei igl emprem vegnius rebattius dalla defensiun, ina secunda flanca naven dalla vart dretga ha il goli denton buca saviu spedir naven, aschia che Aron Büchler ha sittau la balla a moda spectaculara cun ina «bicicletta» en gol.

Era il secund gol per Schluein Glion ei curdaus suenter in siet da cantun. Ruben Rechenbach ha sittau quella ga la balla ferm e miez ault avon il gol da Cuera, nua che Lars Zala ha controllau ella cul pèz e sittau ella reit. Silsuenter ei il giug secalmaus empau ed omisduas equipas han buca scaffiu pli grondas caschuns da marcar entochen tier il te da pausa, il qual ha per inagada buca saviu esser caulds avunda.

Decisiun ella 70. minuta

Era ella secunda mesadad eis ei plitost iu vess ad omisduas equipas da baghegiar si il giug. Quei denton buca pervia dil pastget, il qual splendurava aunc buca en in aschi frestg verd sco normalmein a Crap Gries, mobein plitost pervia da mancos persunals dils giugadurs, ils quals capetan beinbugen suenter la pausa d’unviern. A Schluein Glion eis ei lu tuttina gartegiau da decider il giug ella 70avla minuta cun ina biala acziun che ha giu siu origin silla vart seniastra. Ruben Rechenbach ei vegnius lantschaus ell’ala e siu pass travers ha Lars Caduff menau directamein el cantun bass.

Beat Dermont

Miez-final dil Cup grischun
Schluein Glion – Cuera 97 2 3:1 (2:1)

Crap Gries. 96 aspectaturs. Arbiter: Aliji.

Gols: 6. Rosafio 0:1, 8. Aron Büchler 1:1, 27. Lars Zala 2:1, 70. Caduff 3:1.

Schluein Glion: Mattia Büchler, Laurin Zala (65. Walter), Cavegn, Aron Büchler, Coray, Arpagaus (46. Paulin), Rechenbach (80. Weishaupt), Ronny Casutt, Deplazes, Caduff (72. Rafael Manetsch), Lars Zala.

Cuera 97 2: Suznjevic, Bogdanovic, Oertli, Collenberg, Detommaso, Manojlovic, Teixeira (4. Almeida), Thayapararajah (58. Mahari), Neuhaus (87. Lanfranchi), Iwadi (Sousa), Rosafio.

Remarcas: Carta melna: 20. Arpagaus (foul). Schluein Glion senza Gianluca Casutt, Wellinger (blessai, reconvalescents), Afzali, Remy Manetsch (absents). 47. siet da cantun sin la traversa Schluein (Deplazes). Corners: 9:1.