Il video-maker che perda sia patria pervi da Putin

Per spira casualitad e per lungurella hai jau decis sonda passada da guardar in film sin Arte. Mia decisiun è crudada a favur da: «Ein Nobody gegen Putin». – E tge surpraisa, in di pli tard gudogna quel film documentar in Oscar!

Il film è l’istorgia da l’autur sez, da Pawel «Pascha» Talankin. Quel viva en Russia en il pli profund Ural. El è engaschà en ina scola populara, nua ch’el è ina sort lavurer da giuventetgna e nua ch’el è il video-maker. Vul dir: Per incumbensa da sia scola sto el documentar filmicamain diversas lecziuns ed occurrenzas. Sia citad natala è ina da las pli sgarschaivlas da quest mund: Karabasch. Causa la gronda industria d’arom vala Karabasch (tenor l’Unesco) sco ina da las pli tschuffas citads dal mund.

La vita da Pascha Talankin mida cumplettamain l’onn 2022 cun l’attatga da Wladimir Putin sin l’Ucraina. Ils uffants, la scola e tut la cuminanza ston marschar tenor la propaganda da Moscau. L’instrucziun vegn messa sut l’ensaina da la guerra e da la «defensiun da la patria». Pass a pass vegnan tuttas e tuts taschentads, indoctrinads e drillads. Anteriurs scolars da Pascha Talankin vegnan mobilisads per l’armada. Els ston ir a la front en l’Ucraina – e turnan morts.

Il film «Ein Nobody gegen Putin» documentescha – en ina pitschna scola – co ch’il sistem autocratic da Putin sragischa mintga idea democratica. I na dat nagina libertad d’opiniun pli e nagina perspectiva. E surtut engola Moscau al nobody Pascha Talankin insatge che al stat a cor: Karabasch. Sia glieud. Sia citad. Sia patria. Il film finescha cun la fugia dal video-maker or da la Russia. Uss ha el pia gudagnà in Oscar. Plainamain merità! Il film vegn mussà ussa sin pliras plattafurmas, p.ex. sin Play SRF u sin Arte.