«In’ovra che fascinescha e tschaffa era ils giuvenils»
La fin da quest’jamna va il Chor dil gimnasi ed internat dalla claustra da Mustér per la 50avla ga sin turnea. Sil program stat il requiem op. 48 da Gabriel Fauré. Sco strusch in’autra ovra stat ella per confiert, speronza ed attaschadadad. «Igl ei musica che tschaffa, era la giuventetgna», di Rilana Cadruvi Scherrer che diregia il chor communablamein cun siu consort Clau Scherrer.
La turnea dil Chor dil gimnasi ed internat dalla claustra da Mustér ha siu origin el «Di da Cuera» introducius d’avat Pankraz Winiker avon rodund 50 onns (mira box). Ord quei di ei sesviluppada ina retscha da concerts ch’ei oz aschidadir il punct culminont annual el calender dil chor. Extraordinaris ei igl onn 2015 staus pil chor. Lu ha la turnea menau per liung dil Rein cun concerts entochen el dom da Cologna. Per quei grond project cul tetel «Ut unum sint» e cun siu dirigent da lu, Ursin Defuns, ei il chor vegnius undraus cul Premi Lily Waeckerlin.
«In tema omnipresent»
«Pil giubileum da 50 onns dalla turnea dil chor havein nus repriu in’ovra che nus havein representau gia avon entgins onns. Il requiem op. 48 da Gabriel Fauré ei in’ovra che fascinescha era la giuventetgna. Igl ei musica che tschaffa», di Rilana Cadruvi Scherrer che diregia il chor communablamein cun siu consort Clau Scherrer. Confiert, speronza ed attaschadadad seigien temas omnipresents. «Els aulzan ord il stgir e senza declarar ditg tschaffa la musica era ils giuvenils», puntuescha la codirigenta.
65 cantaduras e cantadurs
Il Chor dil gimnasi ed internat dalla claustra da Mustér dumbra 65 cantaduras e cantadurs. El ei in dils renomai chors gimnasials en Svizra. Sias prestaziuns ein renconuschidas, era perquei ch’il gimnasi dat bia peisa silla musica. Il requiem da Gabriel Furé (1845 – 1924) ei vegnius presentaus l’emprema ga igl onn 1887. Sco ins sa leger en ina communicaziun dil chor, vala ella sco capoovra dalla romantica tardiva. Cumpletaus vegn il program dil concert dil chor d’uonn cull’ovra «Cantique de Jean Racine», medemamein da Gabriel Fauré. Igl ei in’ovra che procura per ruaus meditativ e profunditad spirtala e va aschia bein aprau cul requiem.
Mustér – Cuera – Turitg
La turnea da quest onn preveda treis concerts. Igl emprem ha liug ella baselgia claustrala a Mustér, il secund ella baselgia dalla s. Crusch a Cuera ed il tierz ella baselgia da s. Francestg a Turitg/Wollishofen. Pil concert ei il chor sepreparaus la fin dall’jamna, gliendisdis e mardis en in camp a Locarno. Leu eis el sededicaus cumpleinamein al cant. «Il cant ha ina gronda muntada al gimnasi. El ei aschidadir ina cunterpeisa als auters roms e forsa era el patertgar da prestaziun ed il squetsch da mintga di. Jeu sentel ch’ils giuvenils gaudan quei, era l’atmosfera da far enzatgei communablamein senza il squetsch da notas», di Rilana Cadruvi Scherrer. Gest per quei motiv hagi il gimnasi era decidiu avon treis onns d’introducir in camp da preparaziun pil chor en vesta alla turnea. «Nus luvrein quater dis intensiv ensemen. Magliein e stein da cumpignia. Aschia enzatgei sco quei camp san ins buca cumprar, quei dat chit», di la dirigenta.
Cant voluntari
Cun excepziun digl emprem onn da scola al gimnasi ei la participaziun al chor voluntaria. Quei era auter pli baul e Rilana Cadruvi Scherrer constatescha: «Quels che vegnan a cantar ein motivai. Differents che bandunan il chor suenter igl emprem onn da scola retuornan pli tard. Quei muossa ch’els apprezieschan l’atmosfera che regia el chor.» Empau problematic seigi ei da baghegiar si ils registers dils umens, per quei motiv fussi ei forsa stau meglier d’obligar scolaras e scolars da cantar el chor era il secund onn da scola.
Concerts dil Chor dil gimnasi ed internat dalla claustra da Mustér sonda, ils 21 da mars 2026 allas 17.00 ela baselgia claustrala a Mustér; dumengia, ils 22 da mars 2026 allas 17.00 ella baselgia dalla s. Crusch a Cuera; dumengia, ils 29 da mars 2026 allas 17.00 ella baselgia da s. Francestg a Turitg/Wollishofen.
1974 l’emprema ga in concert a Cuera
La historia dil Chor dil gimnasi ed internat dalla claustra da Mustér ei fetg liunga. Gia baul suenter la fundaziun dalla claustra igl otgavel tschentaner vegneva la musica tgirada leu, lu aunc en ina fuorma fetg sempla. Sco ins sa leger en ina lavur davart il chor digl onn 1991 dil gimnasiast Claudio Gienal da Mustér, ei il cant sesviluppaus culla historia dalla claustra, respectivamein dil convent. 1532 ha avat Christian von Castelberg schau installar in’orgla ella baselgia da s. Martin. Cun quella vegneva il cant accumpignaus. El ha era envidau muntgs d’autras claustras per vegnir ad instruir musica en claustra a Mustér.
Veglia tradiziun
Gia il 17avel tschentaner ei la musica daventada in rom alla scola claustrala. La fin dil 19avel tschentaner haveva la scola claustrala 71 scolar, ils biars cantavan el chor. Entochen lu formavan surtut muntgs il chor. Il chor cantava primarmein als survetschs divins dalla claustra. Sco ins sa leger ella lavur da Claudio Gienal, ei il chor sepresentaus igl onn 1953 sut la direcziun da pader Ansgar 80 ga a survetschs divins dalla claustra. Pli e pli ha il chor denton era entschiet a sepresentar ordeifer, per exempel a fiastas da cant. Igl onn da scola 1972/73 ha la claustra recepiu l’emprema ga mattatschas al gimnasi. Aschia ei sedau lu in niev potenzial per vuschs da sopran ed alt pil chor.
La «cuolpa» ei Pankraz Winiker
Pader Pankraz Winiker, pli tard avat dalla claustra, ei staus igl iniziant dalla turnea dil chor che sa festivar il giubileum da 50 onns uonn. El rom da siu concert annual ei il chor sepresentaus igl onn 1974 l’emprema ga ella baselgia dalla s. Crusch a Cuera. Quei concert ei allura daventaus tradiziun e pli tard ei quella turnea vegnida cumpletada cun in concert a Turitg. La retscha da concerts ei vegnida cuntinuada da siu successur sco dirigent Ursin Defuns. El ei staus igl emprem dirigent buca muntg. 20 onns ha el dirigiu il chor avon che surdar el igl onn 2011 a Clau Scherrer che parta quei pensum cun sia consorta Rilana Cadruvi Scherrer. (fmr/hh)
Gust da leger dapli?