Sur cunfins – cun tuns fins

Il chor seigi aviarts per tuttas direcziuns geograficas, ha el informau ella prevista dil concert, naven digl agen sulom vegli el denton buca seschar stermentar d’entupar autras tiaras, culturas e harmonias. Sonda e dumengia ha las visitadras ed ils visitaders giu tschaffen da seschar menar sin viadi. Il Chor Surselva ha envidau a siu project 2026. In program che informescha dil cuntegn detti ei buca, ha il dirigent Rest G. Tuor puntuau en siu beinvegni. Ins dueigi seschar influenzar dallas harmonias e dils ritems, ha el intimau. Ins ha pia astgau seschar surprender. 

Pli ritmic egl ost

Il viadi ha entschiet cun tuns digl «agen», numnadamein la cumposiziun Danunder…? da Gion Antoni Derungs. La mezzosopranista indigena Salome Cavegn ed il pianist Eric Christen han entschiet cun quella canzun. A capella e cul piano ha il chor cuntinuau cun «L’uolp op. 7», medemamein da Gion Antoni Derungs cun plaids da Gion Deplazes. Lu eis ei iu el lontan, viers nord, ost, sid e vest. En memoria ein restadas «The Rose» e la melodia fina «Days of beauty» per chor da dunnas. Omisduas ein dil cumponist norveges Ola Gjeilo. Suenter ha Salome Cavegn interpretau, puspei accumpignada dad Eric Christen, duas canzuns, ina da Benjamin Britten e Gustav Mahler.

Viers ost eis ei vegniu pli ritmic. A capella ha il chor cantau la canzun dalla Serbia «Na bentbasu» e dallas Filipinas «Rosas pandan». Omisduas han perschuadiu cun in chor attent che mira sil dirigent, ins ha s’encurschiu la buna expressiun, mo era articulaziun. Suenter la canzun dall’Ucraina da Volodymyr Wermenytsch cun chor, solista e pianist ha Salome Cavegn cuntinuau il viadi cun ovras da Gioacchino Rossini, Carlos Gardel e Xavier Montsalvatge. Avon che ir encunter il vest, vul gir sur gl’ozean, ha il chor aunc cantau la populara «Shosholoza» dall’Africa dil sid. Ins havess giu gust da sesalzar dils bauns dirs e da saltar el ritmus da quei himni da speronza, unitad e resistenza encunter malgiustia.

Cantar e tedlar canzuns sa cunfortar cor ed olma. Quei han ins pudiu sentir ella davosa part. Gl’emprem il quietont «Earth Song» da Frank Ticheli. Salome Cavegn ha interpretau ovras da Hector Berlioz, ed in’autra franzosa «Je voudrais…» da Cécile Chaminade. Dad Eric Whitacre «The Seal Lullaby» ei ina canzun meditativa, il cuntrast tiels saults digl ost e sid. Cullas ovras «When music sounds» e «A flower remembered» digl Engles John Rutter ei il concert variont sur cunfins buca ius a fin. Alla fin ei il chor numnadamein returnaus en patria. El ha cumpletau il viadi cun schar tedlar ina secunda gada «L’uolp op. 7». Senza vuler svaletar la biala sentupada inspironta fuss ei stau d’engrau da regalar agl auditori aunc ina tipica populara romontscha da Tumasch Dolf ni Hans Erni.