Musica our dad ün’idea da biera
Nada es l’idea da far musica insembel grazcha a l’occurrenza «Viva la musica» chi vaiva gnü lö avant trais ons illa büvetta pro Scuol. Our da set compels chi han giodü insembel la musica dad oters haja dat üna nouva cumbinaziun cul nom «Ils 7 Nanins».
Daspö trais ons procuran Ils 7 Nanins da Scuol per buna atmosfera a festas e partis. Cun grond plaschair e motivaziun fan els – intant in ot – musica insembel, sco cha Nicolo Bass ha quintà invers RTR. Eir schi sun uossa in ot es il nom restà, declera il musicant chi suna il tenor ed es il manader musical: «Pro üna da nossas prümas occurrenzas musicalas ans vaina stuvü decider per ün nom e cun quai cha nus d’eiran da quel temp in set giaiva quai güsta bain culs nanins. Ed uossa è’l oramai restà.»
Tanter ils ot musicants esa da quels chi han cumanzà a sunar darcheu lur instrumaint davo divers ons chi nu til vaivan plü toc laint e cha’ls instrumaints d’eiran be in s-chaffa. «Ed ün da quels, quasi l’ottavel ha perfin cumanzà a sunar illa gruppa sainza cugnuschentschas musicalas», agiundscha il manader musical. «Il prüm tgnaiva’l be oura ün, duos tuns dürant ün toc. Ed uossa intant piglia’l lecziuns ed es illa società da musica.»
Idea da biera e buna atmosfera
La fundaziun da la gruppa saja nada our dad ün’idea da biera, quinta Nicolo Bass l’istorgia dals 7 Nanins. Malgrà quista partenza saja l’intera istorgia üna da success. La finamira da la gruppa da musicants saja da divertir e derasar üna buna atmosfera, discha’l ed agiundscha: «Far plaschair ad otra glieud es il plü bel chi’s po far.» Il stil da musica es in mincha cas adattà per festas da divertimaint e partis. Güsta d’incuort han els perfin registrà duos tocs insembel cun ün producent a Sent. Ün da quels tocs es ün dal la gruppa «Fäaschtbänkler» tradüt in rumantsch. Tschel toc ha il cumponist grischun Flavio Bundi scrit aposta per Ils 7 Nanins da Scuol.
Fingià daspö trais ons fan els uossa insembel musica, sun persvas chi vegnan adüna meglders, plü lönch chi sunan insembel, uschea Nicolo Bass. Ma quai chi fetscha propa il plü ferm plaschair es alch oter: «Nus eschan giuven e vegl. Eu poss sunar insembel cun meis figl e nus vain amo ün oter pêrin da bap e figl aint illa gruppa e quai es propa quai chi motivescha da pudair sunar insembel culs giuvens ed avair plaschair.» E lur plaschair as muossa eir i’ls ingaschamaints: Adüna plü suvent sun ils ot musicants dals 7 Nanins da Scuol insembel sül palc e divertischan il public da festas privatas e partis plü grondas.
Gust da leger dapli?