Ils bulius – dalla tema dil tissi alla delicatessa

Sonda, ils 21 da mars 2026 allas 19.00 referescha Jon Mathieu davart «la scuvretga moderna dil mund dils bulius – dalla tema dil tissi alla delicatessa.» Il referat ha liug ella Sala Cristalla dalla halla da sport e cultura Dulezi a Sedrun.

Creatiras misteriursas

Ils bulius stattan dapi plirs decennis fetg en moda en gasettas, en publicaziuns scientificas ni ad exposiziuns. «Els vegnan tractai sco creatiras misteriusas, multifaras ed empermettentas», scriva l’organisatura dil referat, TujetschVivaCultura, en ina communicaziun als mieds da massa. Era il diember da rimnaders e rimnadras els uauls ha contonschiu records. Quei ei denton buc adina stau aschia. Tochen el 20avel tschentaner valevan ils bulius en Svizra ed ell’Europa occidentala per bia persunas sco prigulus ch’ins dueva evitar, gie schizun destruir.

Damondas sin damondas

Co ei la midada d’ina societad che temeva ils bulius sesviluppada ad ina societad che appreziescha e careza ils bulius? Tgi ha contribuiu tgei a quella midada? Eis ei stau la savida d’experts dils marcaus ni la savida d’experientscha dallas regiuns ruralas? E tgei savein nus emprender ordlunder? A quellas damondas s’avischina Jon Mathieu quella sera. El ei in dils pli profilai enconuschiders dalla cultura alpina.