In meins e miez avon la fiasta federala – la Societad da musica Trun dat concert

Suenter haver collaborau dus onns cun chors e cantauturs sepresenta la Societad da musica Trun ils 28 e 29 da mars 2026 puspei persula sin tribuna. Agid dat ei tonaton d’ordeifer, pertgei in ni ina ni l’autra musicant(a) hospitonta gida era uonn da serrar las retschas dalla brass band da Trun. Quei sistem ei secumprovaus. Che la musica da Trun ei era igl onn 2026 fetg robusta ha da far cun quella mischeida da musicantas e musicants – e cun las stentas dil dirigent Adrian Degonda e dil president Gion Simeon che tegnan enta maun las hottas musicalas ed organisatorias.

Fiastas da musica dat ei quasi mintg’onn zanua el Grischun. Ina fiasta federala dat ei denton mo mintga tschun onns, uonn ei quei dils 14 tochen ils 17 da matg a Bienna el cantun Berna. Ils da Trun ein stai la davosa gada igl onn 2001 a Fribourg a fiasta federala. Suenter in quart tschentaner eis ei uonn puspei aschi lunsch: Per Adrian Degonda ei quei ina buna caschun per promover sia band: «Ir a fiasta munta, ch’ins less carmalar ora la megliera versiun pusseivla dalla musica. Quei pretenda da mintgina e mintgin da star vidlunder e bandunar adina puspei la zona da confort.» Secapescha ch’ins vegn ad udir il toc da pag «Viking Age» duront concert.

Musica live ei ozildi ina dallas paucas fuormas d’art e cultura ch’ei cun garanzia buca scaffida cun intelligenza artificiala. E tuttina fa la musica da Trun zatgei digital duront quei concert. Ei vegn a dar in legn per igl entir publicum. Tgisà, forsa ch’ei dat da gudignar bigliets per la fiasta federala a Bienna. Il marcau ella regiun dils treis lags al pei dil Giura valess en mintga cass la peina da far ina viseta.