Il «clom» cumpara finalmein

Il project dil canzunari sur- e sutsilvan vegni ad esser in muossavia sin plaun naziunal. Gia seigien organisaziuns svizras s’annunziadas che veglien «copiar» l’ovra: Quei havevan ils dus meinaprojects dil cudisch ecumen da canzuns tradiu la fin d’uost 2021 alla FMR. Avon prest tschun onns eran ils teologs Jan-Andrea Bernhard ed Andri Casanova amiez las lavurs pil «clom». Aschia senumna il cudisch da cant ecumen niev. La fin d’october 2020 havevan els entschiet a rimnar las empustaziuns. En tut eis ei 6000 cudischs reservai per las baselgias en Sur- e Sutselva. En collaboraziun cun ina squadra da 20 persunas han ils meinaproject preparau il cudisch da canzuns per quels da priedi e per quels da messa. Quel vegn a remplazzar igl «Alleluja» ed il «cudisch da chorals».

Quater vernissaschas

Sco quei che Jan-Andrea Bernhard ha explicau a caschun dalla davosa conferenza regiunala dallas pleivs evangelicas sursilvanas, ei il «clom» ussa en stampa, el vegni presentaus festivamein da Tschuncheismas. Sco il co-meinaproject ha informau, dat ei quater vernissaschas, e quei da Tschuncheismas. Duas ein la dumengia da Tschuncheismas, ils 24 da matg 2026. Tenor il fegl d’informaziun ch’il co-meinaproject ha distribuiu, ei ina la damaun allas 9.30 ella baselgia parochiala da s. Gions a Mustér. Il suentermiezdi allas 17.00 suonda la secunda en Lumnezia. A Vella, ella baselgia parochiala da Pleif, ei la vernissascha dil «clom» integrada, sco a Mustér, en in survetsch divin festiv.

Da gliendisgis-Tschuncheismas, ils 25 da matg 2026 suondan duas ulteriuras vernissaschas. Ina ei la damaun allas 10.00 en cumbinaziun cun in survetsch divin festiv ella baselgia da sogn Martin a Ziraun en Val Schons. L’autra suonda il suentermiezgi allas 17.00. Per la Foppa ei la presentaziun festiva dil «clom» ella baselgia parochiala catolica a Sagogn. Leu cooperescha il Chor baselgia ecumen da Sagogn en in survetsch divin ecumen. Dapli detagls dallas festivitads, dil project e dil cudisch da canzuns niev suondien pli tard, ha Jan-Andrea Bernhard declarau alla conferenza ch’e stada dacuort a Sagogn. Il «clom» ei in’ediziun communabla dil Decanat Surselva e dalla Fundaziun Cadonau pil romontsch en baselgia.