Per en de esser gastronoma

Gastro Grischun è l’uniun tetgala tgi reunescha radond 1000 ustiers e hoteliers digl antier cantun. En pensum dall’associaziun è er da promover las professiuns dalla gastronomia e d’entusiasmar persungas giovnas da far en amprendissadi ainten la gastronomia. Tar chella branscha èn las pussebladads da far en amprendissadi fitg vastas. La miglra basa per far carriera ainten la gastronomia è da far en amprendissadi da cuschinier u cuschiniera.

Pussebel è er da far en amprendissadi scu camerier u cameriera, en amprendissadi mercantil, da recepziunist u recepziunista u scu experta da vegn. Da frequentar siva d’aveir fatg en amprendissadiena scola da hotel è alloura er la veia da success.

Ancunaschaintas èn an Svizra cunzont las dus scolas da hotel da Lucerna e da Losanna. Chegl è bagn tot bel e bung, realitad è alloura tgi davart da mats e mattas è avant mang pi pac interess per sa decider da far en amprendissadi ainten la gastronomia. Persiva dattigl plessas raschungs. Luvrar alla fegn d’emda, igl taimp da lavour irregular u luvrar savens la seira. Vetiers vign er tgi l’indemnisaziun per la lavour è tenor blers e bleras betg la pi ota.

Directamaintg ainten en travagl

Gio igl 2025 è l’acziun da promoziun «Klassengastro» da Gastro Grischun stada en success ed er actualmaintg è chegl igl cass. Passa 25 restorants sa participeschan siva da dus meis all’acziun da promoziun e dattan a scolars e scolaras la pussebladad da piglier invista digl menaschi gastronomic. Tranter oter on scolaras e scolaras luvro per en de aint igl restorant «Casa Caminada» a Fürstenau/Farschno tigl star-cuschinunz Andreas Caminada. Marde passo èn er seis mats e mattas dall’amprema classa superioura da Surses sa participos all’acziun.

Els ed ellas on passanto en de ainten la cuschigna digl Tgesa Romana a Savognin tar Mirco Gruber ed aint igl restorant tar Daliah Steiner-Gruber ed Alicia Steiner. En team è sto responsabel per cuschinar e l’oter team ò preparo las meisas per la tschagna per sarveir la seira igls giasts. Igls giasts èn nign oters tgi igls genitours, els tg’èn nias sarvias bagn ed èn er stos cuntaints.

Siva da plessas instrucziuns e d’aveir piglia invista digl travagl on alloura igls scolars e las scolaras surpiglia tenor lour forzas ed abilitads pass per pass igl menaschi. Daliah Steiner-Gruber, la patrunga ò preschento igl menaschi. Ella ò er menziuno tge amprendissadis tgi la branscha da gastronomia porscha. Igls treis mats e las treis mattas on bagn gizzo las ureglias, ma cun grondas marveglias spitgivan scolars e scolaras da finalmaintg scumanzar lour lavour aint igl Tgesa Romana.

Ena bunga plattafurma

Mirco Gruber, igl patrung e cuschinier digl Tgesa Romana è sa musso tot cuntaint tgi davart digl scolast Hannes Willisch, tgi instruescha 1. classa superioura seia sto avant mang igl interess da sa participar all’acziun «Klassengastro». Mirco Gruber ò detg anvers la FMR tg’el ed er la sia sora Daliah Steiner-Gruber seian tots dus dalunga stos pronts da realisar chel de spezial per las scolars e scolaras.

Hannes Willisch, igl scolast ò menziuno tgi cura tgi davart da Gastro Grischun seia neida la dumonda sch’ins viglia sa participar all’acziun da promoziun seia el bagnspert sto persiva e dalla parteida per organisar igl de. Realitad è alloura tgi igls treis mats e las treis mattas on gia lour gaudi d’esser per en de hospitants, ustiers, cuschiniers e cameriers e camerieras. Sarvia e cuschino on els ed ellas en bel menu cun en prepast, en plat principal (en caré da vadel, cun gratin da tiffels e verdura) e naturalmaintg en dessert.

170 mats e mattas

Sto preschaint a Savognin aint igl Tgesa Romana è er Marc Tischhauser, igl magnagestiun da Gastro Grischun. Anvers la FMR ò el menziuno tgi l’uniun digls ustiers amprova cun diversas maseiras ed acziuns da far daple reclama per las professiuns dalla gastronomia. En’ulterioura fegnameira seia er da motivar betg angal scolars e scolaras, mabagn er lour genitours da metter ena geda pe ainten la gastronomia per vaseir davant e davos las culissas d’en travagl gastronomic.

Anfignen ossa seia l’acziun da promoziun stada en veir success. Marc Tischhauser ò er detg tgi ples giuvenils seias sa decidias da far en amprendissadi ainten la gastronomia sen fundamaint dall’acziun «Klassengastro». Igl magnagestiun da Gastro Grischun ò alloura detg tgi igl avost 2025 vegian 175 mats e mattas scumanzo aint igl Grischun en amprendissadi tar en travagl da gastronomia. Igl 2023 eran chegl 120 giuvenils, damai ins vegia gia an treis onns en augmaint fitg plaschevel.