Lectura Rumantscha

Tant enavant en urden

Has ti forsa anc in pitschen purschè da spargn en tes dachasa che ti pos en temp da miseria sfratgar cun in martè? – Damai: Il purschè da spargn sto il chantun Grischun prest tschertgar. La mesemna ha il minister da finanzas Martin Bühler preschentà in deficit da passa 200 milliuns francs en il rendaquint annual. Ma tant enavant è anc tut en urden: Il conto dal Chantun è bain emplenì – grazia a las reservas ch’èn vegnidas ramassadas ils ultims onns.

Pli u main pront

Tge è il pli impurtant per tai, sche ti vas en vacanzas en in hotel? Èsi la survista dal balcun da la chombra anora? U èsi la bar, nua che ti empostas in bun drink? – L’anteriura clinica Gut amez San Murezzan è ils ultims mais vegnida transformada en in bel hotel, quai dals amis Mic Schneider e Martin Camichel. La Posta Ladina ha fatg ina visita tar ils dus neo-hoteliers en l’hotel, ch’è pli u main pront.

Pulits plans

Has ti anc la survista da tut quai vegn bajegià a Mustér? La FMR ha rapportà dad ina nova halla d’acrobatica, dad in nov bajetg per la scola – ed oz scriva il redactur Hans Huonder gia dal proxim project: Il lavuratori communal a Cuoz duai vegnir engrondì per garantir avunda plazza per fatgs da via, fatgs forestals, ils pumpiers ed anc auters interessents.

Bun divertiment cun la Lectura Rumantscha!