Sustegn per l’access a lingias da vaider per affars

Üna trentina da persunas sun seguidas in gövgia passada a l’invid pella prüma radunanza generala da la Società da commerzi e manterstanza Engiadina Bassa cul nouv president Jon Armon Strimer. In seis rapport presidial ha Jon Armon Strimer dat ün sgaurd sün seis prüm on in uffizi e sün differents arrandschamaints cha la società ha organisà l’on scuors. Da manzunar es dal sgür il di da las portas avertas per scolaras e scolars da Zernez fin Samignun chi’d es stat darcheu ün grond success.

In tuot 69 giuvenils han visità dürant ün di var 30 affars da 23 differentas branschas. Per Jon Armon Strimer ha quist model da promoziun da giuvenils as verifichà fich bain. «Las scolaras ed ils scolars pon visitar e lavurar directamaing i’ls affars e vezzan la lavur dal minchadi. Quai es tuot alch oter co visitar ün’exposiziun e ramassar prospects e tacharöls», ha el dit in radunanza. El ha eir intimà als affarists da l’Engiadina Bassa d’actualisar regularmaing las glistas cun sportas da giarsunadi e sportas d’insai. Implü ha el eir critichà las parolas da l’Uniun da mansteranza grischuna, quai impustüt a reguard l’iniziativa SRG SSR e davart la valur da l’aigna locaziun.

Differentas occurrenzas dürant l’on

Las commembras ed ils commembers preschaints han fat bun il rapport dal president e las ulteriuras tractandas da la radunanza generala da la Società da commerzi e mansteranza Engiadina Bassa. Sco cha’l president da la società ha quintà als preschaints, sun eir quist on previs differents arrandschamaints. Il prüm ha lö fingià als 1. avrigl in collavuraziun cul büro da svilup regiunal da la Regiun Engiadina Bassa/Val Müstair, cull’Uniun da mansteranza Grischuna e cull’Uniun da mansteranza e Gastro Val Müstair illa Chasa Nova a Scuol.

Davo ün referat dal manader da gestiun da la Thomann Nutzfahrzeuge AG, Luzi Thomann, ha lö üna discussiun da podium cun Gabriella Binkert Becchetti, Irma Tognini, Michi Beer e Kurt Baumgartner davart il tema «affarists chi s’ingaschan illa politica ed in societats». Sco cha Jon Armon Strimer ha dit saja il böt da motivar ad affaristas ed affarists da s’ingaschar illa politica per rapreschantar ils interess da l’economia. Eir la Società da commerzi e mansteranza tschercha adüna darcheu affarists chi s’ingaschan. Uschè per exaimpel a Heidi Laurent-Domenig da Sent chi’d es gnüda eletta unanimamaing illa suprastanza da la società. Ella rimplazza ad Yvonne Rauch da Sent chi’d ha demischiunà sia carica sco chaschiera davo esser statta bundant tschinch ons in carica.

Dürant il’on 2026 organisescha la Società da commerzi e mansteranza Engiadina Bassa darcheu ün di da las portas avertas per scolaras e scolars da la settavla classa. Implü voul il president Jon Armon Strimer organisar quist on üna maisa raduonda culs respunsabels dals cumüns da l’Engiadina Bassa a reguard il tema planisaziun dal territori ed in quel sen davart las revisiuns da la planisaziun locala. La suprastanza da la società ha implü survgni l’incumbenza da far üna revisiun dals statüts a man da la prosma radunanza generala.

Promouver l’attractività per affars

In seguit a la radunanza generala ha referi Claudio à Porta, manader da gestiun da la ditta Energia Engiadina, davart il proget chantunal per ün access a lingias da vaider respectivamaing ad ün bindel ultra-larg. La firma Energia Engiadina es nempe gnüda incumbenzada dal Chantun da realisar quist proget illa regiun in collavuraziun cun miaEngiadina. Cul böt da promouver e svilupppar l’economia cun augmantar l’attractività dals differents lös per affars, sustegna il chantun Grischun il proget cun 50 % dals cuosts. Eir ils cumüns da Zernez, Scuol e Valsot as partecipeschan finanzialmaing al proget in Engiadina Bassa cun 15 %.

Resguardond eir l’investiziun da l’EE-Energia Engiadina sco possessura da las lingias da vaider, resta finalmaing üna part da be 3 % pels affars chi vöglian ün access a la rait da fibras da vaider per internet a bindel larg. Sco cha Claudio à Porta ha orientà, sun tuots ils affars illa regiun d’incuort gnüts infuormats in merit. «Per mincha affar chi ha l’intenziun da realisar ün access a las lingias da vaider resultan finalmaing cuosts d’attach da 270 francs», ha’l infuormà dürant seis referat.

E scha’ls affars hajan interess da far ün abunamaint pro miaEngiadina, schi surpiglia quella dafatta eir amo quels cuosts. «Quai voul dir cha l’access per affars es vairamaing gratuit e tuot la creaziun da valur e las plazzas da lavur restan illa regiun», uschè il manader da gestiun da l’Energia Engiadina. Eir la Società da commerzi e mansteranza Engiadina Bassa sustegna quist agir e vezza l’argumaint da creaziun da valur e las plazzas da lavur sco avantag invers la concurrenza naziunala.