Aunc memia baul da trer conclusiuns
La curdada d’ina gondla el territori da skis dil Titlis/Engelberg ha evocau gronda consternaziun ell’entira Svizra. Diversas medias discuoran d’in scenari da horrur. Pil turissem da skis eis ei lu era buca gest in schabetg ch’ins pren semplamein notizia. La FMR ha dumandau treis pendicularas en Surselva pertuccont segirtad, mesiras e consequenzas.
«Gie, mesjamna da miezdi, gest cu la communicaziun ei vegnida, havein nus discutau surlunder. Actualmein dat ei denton aunc memia paucas informaziuns ufficialas co gl’accident ha saviu schabegiar», declara Sandra Brügger. La meinagestiun dallas pendicularas Breil-Vuorz-Andiast conferma, sin damonda dalla FMR, che l’interpresa vegli aunc spitgar ils detagls dallas retschercas ed inquisiziun avon che saver examinar mesiras culs producents da lur implonts e trer ulteriuras conclusiuns. Mintga gi schabegian accidents mortals. Al plaz da lavur, sin via, en casa, ed era en territoris da skis.
Rapportar da tals ei in’incumbensa dallas medias. Quei ch’ei schabegiaus mesjamna el territori da skis dil Titlis ella Svizra Centrala ha retschiert dapli attenziun. Buca mo perquei ch’igl ei in schabetg spectacular.
In fermagl ha disgiu
Las medias naziunalas discuoran d’in scenari da horror. Duront ch’in vent burasclus buffava, ei ina cabina d’ina teleferica curdada giu d’ina suga. In video d’ina perdetga privata ch’ei sederasaus tras las medias electronicas muossan co la gondla croda ella costa teissa, turnigla sco in crap e resta sefitgada ella neiv. Ella gondla sesanflava ina dunna da 61 onns, quella ei morta aunc el liug digl accident. Per in territori da skis ei in tal accident il mender siemi pusseivel. Ils implonts da transport ston garantir la segirtad dils hosps. Igl ei la cundiziun la pli aulta, e quella segirtad garanteschan ils menaschis lu era cun sistems da controllas fetg rigurus.
Il meinagestiun dallas pendicularas dil Titlis, Norbert Patt, in Grischun oriunds dalla Tumliasca, ha giu da prender posiziun quasi nuninterruttamein allas medias naven da mesjamna tochen gievgia. Era siu superiur, il president dil cussegl d’administraziun dallas pendicularas, Hans Wicki, ei staus ina persuna tschercada ed ha giu da rispunder a damondas aviartas. El ha confirmau ch’igl accident tragic seigi schabegiaus exact il mument ch’ils collaboraturs dalla pendiculara hagien decidiu da tschentar giu la pendiculara e da prender en segirtad las gondlas.
Sco quei che Norbert Patt ha declarau alla conferenza da medias, ei in fermagl che tegn la cabina vid la suga sesligiaus. Daco che quei ha saviu schabegiar sappien ins denton aunc buca declarar, ha el getg.
«Tuccau nus fetg»
Per che la gondla dil sistem Garaventa sappi setschappar ella staziun ella suga da transportar, sesarva e sesiara quei fermagl. Montaus sisum il bratsch dalla gondla sesarva e sesiara el mintga gada automaticamein. La segirtad survigileschan sistems electronics, moniturs e persunal. Ton tier ils detagls tecnics. Ils motivs daco ch’il fermagl vid il bratsch ha pudiu sesligiar duront che la suga transportava la gondla, ei caussa dallas inquisiziuns currentas.
Il cass mortal ch’ei schabegiaus fatschenta buca mo las pendicularas dil Titlis, mobein mintga singul territori da skis en Svizra. Ei va per la garanzia da segirtad, ils hosps sefidan dils implonts. «Quei accident ad Engelberg ha secapescha tuccau nus fetg», scriva Sandra Brügger, la CEO dallas pendicularas da Breil-Vuorz-Andiast, sin damonda dalla FMR. Il redactur ha dumandau sch’ella e siu team hagien gia discutau il cass, forsa en ina sesida speciala. En sia posiziun conferma la meinagestiun ch’ella sappi sefidar d’ina squadra cun experientscha sur biars onns. Cuntinuadamein, era duront ils temps che las pendicularas circuleschien, survigileschi quella squadra tecnica ils implonts e sappi era giudicar l’influenza da facturs externs, sco da vents burasclus. Dapli ha ella buca saviu e vuliu communicar.
Negin commentari
Ina posiziun pertuccont segirtad, prevenziun e mesiras ha la FMR dumandau era las pendicularas Arena Alva a Laax. Martina Calonder, la pledadra da medias ha tarmess ina cuorta risposta a scret: «Entochen ch’il Survetsch svizzer per l’inquisiziun da segirtad (SISE) ha buca scleriu definitivamein il motiv effectiv che ha caschunau quei accident, vulein nus buca prender posiziun.» La plidadra dall’interpresa supplichescha per capientscha ch’ins detti buca dapli sclariments. L’Arena Alva ei stada pertuccada ils davos onns sezza en examinaziuns dil SISE pervia d’accidents ch’ein schabegiai.
Las medemas damondas pertuccont sesentir, segirtad, e mesiras ha la FMR tschentau era allas pendicularas Sursaissa-Mundaun. Il CEO Markus Good, ha denton buca rispundiu tochen la fin da redacziun.
Gust da leger dapli?