Il webshop es darcheu in funcziun

Il webshop dal tren d’autos tras il Vereina funcziuna darcheu. Quai ha la Viafier retica comunichà in marcurdi invers sia cliantella chi ha ün account per cumprar bigliets pel tren d’autos online. Chi chi voul darcheu far adöver dal servezzan sto il prüm però müdar seis pled clav, sco cha la Viafier retica scriva plünavant. Als 21 schner 2026 vaiva ella infuormà chi haja dat üna attacha da cyber sül webshop dal tren d’autos. Cha pro quella sajan gnüdas involadas eir datas persunalas sco nom, adressa postala e dad e-mail. Pervi da quella attacha d’eira il webshop uossa s-chars duos mais our d’funcziun. Intant cha la Viafier retica ha reintrodüt seis servezzan digital pel Vereina, ha’la eir annunzchà ün müdamaint pro seis servezzan analog: Il fanestrigl illa staziun da Zernez vegn serrà per la fin da gün 2026. Strichà dal tuot nu vain quella sporta però. Ch’impè dad in l’edifizi da staziun as chattaraja quella in futur illa filiala da la posta be ün pêr pass davent, scriva la Viafier retica in üna comunicaziun a las medias. (cdm/fmr)