In candidat per la suprastonza communala maunca

Ils 9 da mars 2026 ei il termin per nominaziuns pils gremis politics dalla vischnaunca da Tujetsch che vegnan eligi ils 3 da matg 2026 spiraus. Pil presidi communal candidescha Martin Cavegn e per la suprastonza communala Daniel Schmid, Nicole Giossi e Guido Monn. Tuts quater ein gia en uffeci. Sco ins sa leger en in’informaziun publicada silla homepage dalla vischnaunca, maunca il mument aunc ina candidata ni in candidat da gerau. El havess da remplazzar Pius Cavegn ch’ei seretratgs. Damai ch’ei maunca aunc ina candidata ni in candidat per la suprastonza communala, vegn la pusseivladad da far propostas prolungida entochen ils 10 d’avrel 2026.

Treis per la cumissiun da gestiun

Per la cumissiun da gestiun recandidescha Silvio Schmid, ferton che Renato Decurtins e Pius Cavegn stattan a disposiziun l’emprema ga per l’elecziun en quei gremi. Ronny Levy recandidescha pil cussegl da scola, per lez maunca denton aunc ina candidata ni in candidat. In surpli da candidaturas dat ei per la cumissiun da baghegiar. Quella vegn buca eligida all’urna, mobein alla radunonza communala. Pils quater posts dalla cumissiun da baghegiar ha il suveran ina schelta da sis candidats.