Ponderaziuns d’extender l’infrastructura dil Campadi Rein
La Campadi Rein SA sa mirar anavos sin in fetg bien onn 2025. Il diember da pernottaziuns dalla plazza da campar sut Rueras ha saviu vegnir augmentaus per 10 % sin rodund 14 000. Ils responsabels pil campadi han priu en mira ina migliur dall’infrastructura.
La sonda vargada ha la Campadi Rein SA salvau sia radunonza generala ordinaria ell’aula dalla casa scola a Sedrun. Il cussegl d’administraziun ch’ei vegnius eligius il schaner 2026 en ina radunonza generala extraordinaria e che consista da Nicole Weber, Jan Maurer e Daniel Monn ha saviu presentar ils resultats d’in fetg bien onn da fatschenta 2025.
In menaschi fetg viv
«Igl onn 2025 ei staus encorunaus da grond success e d’in menaschi viv. Malgrad l’aura variabla – surtut il fenadur – havein nus nudau in augment da 10 %», scriva il cussegl d’administraziun el rapport annual 2025. Tut en tut ei vegniu nudau silla plazza da campar sut Rueras en Val Tujetsch rodund 14 000 pernottaziuns, da quei rodund 1300 igl unviern. «Las 9000 pernottaziuns dil fenadur ed uost – ils meins principals – muossan la stagiunalitad intensiva sin 1400 meters sur mar», constateschan ils responsabels pil menaschi. Ils dis cullas pli aultas frequenzas vivan rodund 400 persunas silla plazza da campar. Quei corrispunda a 130 casadas pintgas. «Cun quei grond diember da frequenzas vegnan ils indrezs sanitars a lur cunfins. Consequentamein ei ina casa nova necessaria per saver segirar la qualitad ed il carschament ton ella stagiun aulta sco ella denterstagiun», scriva il cussegl d’administraziun.
Il futur dil campadi
Dapi entgins onns ei la societad acziunara lundervi da far ponderaziuns co migliurar l’infrastructura. «Alla radunonza generala havein nus vuliu saver co las acziunarias ed ils acziunaris vesan in’investiziun pli gronda. Medemamein havein nus tematisau in eventual alzament dil capital d’aczias. Avon che decider ha la radunonza giavischau dapli informaziuns», di Nicole Weber sin damonda dalla FMR. Il project d’investiziun che porta il num «Campadi Futur» duei vegnir concretisaus uonn. La planisaziun d’ulteriura infrastructura inclusiv ils mieds finanzials duei s’avanzar aschia ch’igl ei pusseivel da prender decisiuns en in onn. Sin fundament dallas investiziuns duei igl avegnir dalla plazza da campar vegnir garantius.
Vinavon cun Nicole Rüegsegger
Il Campadi Rein vegn menaus era igl avegnir da Nicole Rüegsegger. Ella haveva visau il contract d’affittaziun. Il cussegl d’administraziun ha suttamess ad ella in niev ed aschia cuntinuescha ella cun siu engaschament a Rueras. Nicole Rüegsegger ei era stada commembra dil cussegl d’administraziun. Da quel eis ella seretratga il schaner vargau. Nicole Rüegsegger meina il campadi dapi il november 2020.
Gust da leger dapli?