Aquarels nunenconuschents da Tarcisi

Igl artist Tarcisi Cadalbert ch’ei naschius a Sevgein ha viviu da 1943 entochen 2003. El era enconuschents sco Tarcisi ed ei sefatgs prominents sco pictur ed artist d’acziun. En si’emprema fasa da lavur sco artist eis el sededicaus alla pictura d’aquarel. Da quei temps dat ei in tschuppel ovras ch’ein aunc mai vegnidas mussadas publicamein. Cull’exposiziun ella gallaria Zezzaneera el marcau vegl a Glion semida quei. Gievgia, ils 26 da mars 2026 ei la vernissascha da quell’exposiziun. Bea König e Nicoline Schaub che meinan communablamein la Zezzaneera realiseschan quell’exposiziun communablamein culla Fundaziun Tarcisi. Quella ei vegnida fundada igl onn 2021 dalla niaza da Tarcisi Cadalbert, Eveline Spescha-Cadalbert e da siu consort Armin Spescha. «La finamira dalla fundaziun ei da tener en memoria la lavur ed igl art da Tarcisi, sco era da conservar sias ovras», scrivan las menadras dalla Zezzaneera en ina communicaziun als mieds da massa.

Da Sevgein a Turitg

Schegie che Tarcisi Cadalbert ha viviu pli u meins a Turitg naven da 1963, eis el staus attaschaus a sia patria grischuna. A Turitg ha el studegiau igl emprem giurisprudenza e pedagogia sociala. Pli tard eis ei el staus secretari tiel Tages-Anzeiger. Duront quei temps eis el sededicaus pli e pli agl art. El ha fatg quei a moda autodidactica. Naven da 1979 ha el luvrau sco artist liber. En si’emprema fasa da lavur artistica ha el malegiau cun la tecnica d’aquarel. Ses sujets: la muntogna e la natira dalla Surselva. «Cugl aquarel ha el saviu experimentar cun glisch, aua e pigments da tuttas colurs. El ei seretratgs els cuolms nua ch’el ha anflau il ruaus. Quel ha el duvrau per sviluppar siu agen lungatg da malegiar», constatescha la Zezzaneera. Ils aquarels da Tarcisi da siu emprem temps dalla pictura fuorman in’atgna gruppa d’ovras. «Igl ei maletgs impressiunonts. Igl ei lavurs d’in artist sincer, empatic, rebelic e sensibel», constateschan Bea König e Nicoline Schaub.

Differents products

Parallelmein sper l’exposiziun offerescha la Zezzaneera in kiosc. El ei ina part integrala dil concept d’exposiziun. Ell’exposiziun da Tarcisi vegn purschiu products da Turitg, il liug da dimora che Tarcisi Cadalbert haveva eligiu. Medemamein sa vegnir cumprau cartas d’art da maletgs d’aquarel producidas en Surselva.