Ils eroes locals muossan lur cunsts

I pudess bain esser stat ün pitschen giubileum, quista sonda i’l Snowpark dal territori da skis a Scuol. «Forsa ha’la lö per la 20avla jada, nossa concurrenza ‹Local Hero›», suppuona Sandro Damiani in sia rolla sco speaker dürant il spectacul da freestyle. «Ma perquai chi dà davo la concurrenza adüna eir amo üna gronda festa, nun eschna dal tuot sgürs», agiundscha’l lura amo – forsa na cun plaina seriusità, ma in mincha cas da buna glüna.

«Il highlight da la stagiun»

Üna festa esa vairamaing eir fingià dürant il di. Intant cha las atletas e’ls atlets as s-chodan aint e discutan che trics chi vöglian muossar, fan ils oters fingià ir il gril e mettan a fraid las bieras in üna chaista plain naiv.

«Il ‹Local Hero› es per mai il highlight da la stagiun», disch Curdin Erni. El es dürant quel di in acziun in üna funcziun dubla: Sco respunsabel dal snowpark i’l territori da skis e sco suprastant dal club da snowboard Umblanas chi organisescha insembel culla butia e scoula da snowboard Element la concurrenza a Scuol.

El e sia squadra han preparà i’l snowpark sülla Motta ün o tschel obstacul be aposta pel contest, fabrichà trais lingias cun kickers, boxas e rails – uschea cha la giuria chi sezza in üna rulotta ün pa elevada ha üna buna survista sur dals cunsts cha snowboarders e skiunzas muossan. A la dumonda, sch’el nu vess eir svess vöglia da’s partecipar, respuonda’l lapidar e riond: «Eu n’ha pudü trenar massa pac quist on.»

Ils gös olimpics dals giuvens locals

Sandro Damiani però, il mainagestiun da l’Element, surdà tanteraint il microfon da speaker ad inchün oter per liar il snowboard suot ils peis e tour svess part a la concurrenza. «La prüma jada ch’eu m’ha partecipà, quai d’eira dal 2001», quinta’l. Quella jada vaiva l’evenimaint però amo nom «Element Slopestyle» – ed apunta, plü co facil avant 20 ons hana lura müdà il nom sün «Local Hero».

«I’l center sta il plaschair», disch il co-organisatur, «ma blers vöglian quia eir muossar che chi san. I dà ün pêr giuvens, per quels es il ‹Local Hero› quai cha’ls gös olimpics o ils X-Games sun pels profis.» Ch’avant la concurrenza gnia trenà insembel – e cha davo detta minchatant eir ün’o tschella discussiun cun genituors ambizius chi han valütà la prestaziun da lur uffant ün pa oter co la giuria. 

Promoziun dal sport in atmosfera famigliara

Il «Local Hero» es s’inclegia eir ün evenimaint per promouver il sport. «Nus lain natüralmaing chi detta quia üna pruna freestylers», disch Sandro Damiani. Ed intant nu para il futur da quel sport neir periclità illa regiun: Bod 100 atletas ed atlets s’han annunzchats per la concurrenza: mattas e mats, skiunzas e snowboarders, uffants, giuvenils e veterans da tschinch fin – stimà malamaing – 50 ons. Minchüna e minchün chi fa part survain almain ün t-shirt sco premi, quellas e quels chi plachan sül podest lapro amo ün snowboard, üna buscha o üna liadüra.

«Il ‹Local Hero› viva da l’ingaschamaint da voluntaris e sponsurs», dischan ils organisaturs. Uschea es s’inclegia eir l’atmosfera plütöst amicabla co cumpetitiva. Chi chi parta vers ils kickers e rails, vain incuraschi da quellas e quels chi spettan amo cha lur nomer gnia clomà. Il public applaudischa tant a quel chi placha perfettamaing davo ün backside fiveforty mute grab sco a quel disfurtünà chi fua e fila one-footed portond tschel ski i’l böt.

E là spetta garanti fingià üna o tschel cumpogn da cumbat per dar ün «high five», avant co star lingia per ün hotdog bain merità pro’l gril gestiunà dals voluntaris da l’evenimaint famigliar.