«Jeu turnass bugen anavos ella 1. ligia»
Igl onn vargau ha Marino Cavegn fatg la midada da Balzers tier Linth 04. La squadra da ballapei glarunesa sesanfla dapresent el miez dalla tabella dalla 2. ligia interregiunala. Las schanzas d’ascender ella 1. ligia ein aunc intactas. «Mia finamira ei da puspei dar ella 1. ligia sco jeu hai saviu far a Balzers. Sche buca cun Linth 04 lu eventualmein cun in’autra equipa», di il Lumnezian.
«Jeu sesentel fetg bein ella squadra da Linth 04, schegie che la mentalitad ei leu empau autra. La gronda part ei giugadurs tecnicamein fetg buns, mo pertuccont la fisica essan nus Grischuns bia pli ambizius. Magari maunca la voluntad da far il davos sprint. Che nus essan en quei grau pli dirs vegn appreziau leu», di Marino Cavegn (25). Il frar vegl da Fabrizio Cavegn ch’ei profi da ballapei ell’Engheltiara, ei sedecidius igl onn vargau pigl engaschament tier la squadra da Linth04 suenter esser staus engaschaus tier Balzers ella 1. ligia. Aunc avon ha el dau ballapei cullas empremas equipas da Schluein Glion e Cuera 97. Il Club da ballapei Linth 04 ei vegnius fundaus 2004 sco fusiun dils clubs da ballapei Näfels e Niederurnen.
Anavos ella 1. Ligia
Ton Balzers sco Linth 04 han dau ils davos onns ella 1. ligia. Las duas squadras ein ussa adversarias ella gruppa 5 dalla 2. ligia interregiunala ed omisduas han la finamira da returnar ella 1. ligia. «Dalla 1. ella 2. ligia interregiunala ei segiramein in pass anavos. Jeu sperel denton che quel seigi per mei buca per pli liung temps. Mia finamira ei vinavon la 1. ligia», di Marino Cavegn. Linth 04 sesanfla il mument el miez dalla tabella dalla 2. ligia interregiunala. «La schanza da tuttina aunc contonscher igl emprem plaz ein buca sclausas dil tut, schegie ch’ei vegn ad esser grev,» di Marino Cavegn ch’ei in da treis Grischuns tier l’equipa glarunesa. Igl emprem giug da questa primavera ha Linth 04 gudignau cun 4:2 encunter Cuera 97 e la scuntrada dalla sonda vargada ordeifer encunter Seuzach ei ida a fin cun in remis 2:2. Endisch rundas avon la fin dil campiunadi ha Linth 04 in retard da siat puncts sil capogruppa Weesen.
Daco buca profi?
Il contract che Marino Cavegn ha tier Linth 04 cuoza entochen la fin da questa stagiun. Co ei va vinavon cun el lu ei aunc incert. «Mi’ambiziun ei segiramein da dar en ina ligia pli aulta che la 2. ligia interregiunala. Il potenzial hai jeu ed jeu havess era negina tema da far quei pass», di il Lumnezian che lavura sco lennari en Portenza e che habitescha a Zezras. La schanza da s’avanzar per exempel ella Challenge League fuss sedada eventualmein cura che siu frar Fabrizio era engaschaus tiel Club da ballapei Vaduz en lezza ligia. «Mo lu devel jeu ella 1. ligia cun Balzers ed aschia ei quell’opziun en sesez gnanc stada in grond tema lu», di Marino Cavegn che sa dar en sia posiziun preferida tier Linth 04, numnadamein dretg davon. Ellas scuntradas d’entochen ussa da questa stagiun eis el staus adina ella formaziun da partenza. El s’auda tiel tschep dils megliers giugadurs dall’equipa e di: «Il mument sun jeu cuntents sco ei marscha sil plaz da ballapei.»
Magari drova ei era cletg
El ballapei ei il success, respectivamein la disfortuna, fetg datier in da l’auter. Ina buna relaziun cun in trenader ni il cletg da mussar entginas bunas partidas sa spert menar ensiviars en in’autra ligia: «Sper quei cletg ein la mentalitad e l’ambiziun segiramein era decisivas. Fabrizio ed jeu havein luvrau intensivamein ensemen ed jeu crei ch’el seigi oz leu nua ch’el ei era perquei che nus havein motivau fetg in l’auter.» Dil potenzial dalla squadra da Linth 04 ei Marino Cavegn perschuadius: «Cun in ni dus ulteriurs buns giugadurs savessen nus segiramein tener petg ella 1. ligia. Ell’equipa dat gia in tschuppel giugadurs che ha dau en ligias aunc pli aultas.» In retuorn el Grischun – forsa tier Cuera 97 ni Schluein Glion – exclauda Marino Cavegn il mument.
Gust da leger dapli?