In apéro plein energia

Mesjamna proxima presenta il 124avel «Energieapéro Graubünden» a Cuera il cargar ils vehichels electrics e sias sfidas. Quater referents externs egl auditori dalla Scol’aulta specialisada dil Grischun (SASGR) informeschan dalla tematica. «A quei ‘Energieapéro’ a Cuera ei la glieud fetg interessada e numerus prendan mintgamai part», declara Céline Meury. La sviluppadra regiunala dalla Surselva ei vidlunder da rimnar las annunzias pil proxim «Energieapéro». Igl ei in’occurrenza che gl’Uffeci d’energia e traffic dil Grischun ha entschiet ad organisar avon 32 onns. Dapi lu ei la sentupada cun aperitiv sesviluppada ad ina marca.

Tedlar e discutar

Aperos d’energia savess’ins metter en connex cun prender in bien sitg che rinforza e dat energia. Quei savess esser in concentrat cun vitaminas e substanzas nutritivas. Igl «Energieapéro Graubünden» ha denton tschei connex – buca quel dalla sanadad corporala. Igl ei ina sentupada dil fatg egl auditori dalla Scol’aulta specialisiada dil Grischun (SASGR) a Cuera. Buca la sanadad corporala ei el center, mobein l’energia e sias differentas fuormas che nus consumein e duvrein. L’occurrenza ch’ei quater gadas ad onn vul informar e promover la discussiun pertuccont efficienza d’energia, energias regenerablas, ella tracta vinavon era actualitads relevantas en connex cul diever d’energia.

Tuttas sutgas ella sala gronda dalla scola alla Pulvermühlestrasse ein occupadas stediamein, la glieud vul tedlar e discutar da pusseivladads e caussas tecnicas. Mesjamna proxima, ils 25 da mars ei il 124avel «Energieapéro». Sco Céline Meury conferma, ei gl’interess carschius cuntinuadamein. La Regiun Surselva s’auda daferton era tiels organisaturs. «Nus essan colligiai l’emprema gada directamein e savein tedlar ils referats live a Glion», gi la sviluppadra regiunala.

Suenter ch’ella haveva publicau l’occurrenza a Glion, ein las empremas annunzias arrivadas. Quellas han intimau la sviluppadra regiunala da midar stanza. Gl’interess seigi schi gronds ch’ins hagi decidiu da mussar igl ‘Energieapéro’ sil monitur ella stanza gronda. El plaunterren dalla Casa Surselva, la sedia dalla Regiun Surselva alla Via dil Glogn 22a, san interessents tedlar ils quater referats e discutar – duront gl’aperitiv – surlunder.

Negina moderaziun a Gliion

Glion ei buca gl’emprem liug decentral che separticipescha cun livestream all’occurrenza. Gia pli baul ha gl’Uffeci d’energia dil Grischun transmess gl’Energieapéro a Poschiavo, pli tard ein auters loghens suandai, Scuol, suenter Savognin, Tavau ed Arosa. Ussa ha Glion retschiert l’autorisaziun. La transmissiun decentrala fa senn. «Ella pussibilitescha a tuts da separticipar senza stuer far liungs viadis», gi Céline Meury. Ella ei involvada ell’organsaziun. Il «public viewing» da Glion funcziuna semegliont ad in giug da ballapei. Ins astga entrar e tedlar ils referats.

Egl auditori a Cuera moderescha Michael Casutt, meinaproject digl Uffeci d’energia dil Grischun, l’occurrenza. Els loghens decentrals dat ei mo in beinvegni, denton negina moderaziun. Suenter ils referats san participontas e participonts discutar, en cerchel pli pign e local, dallas circumstanzias e pusseivladads ella regiun.

Igl «Energieapéro» ei daventaus ina plattafuorma impurtonta da seconnectar e sebrattar. Mintga gada ei in autra tematica el center. Ina gada eis ei minergie, lu calira a distanza, lu la segirtad dil provediment electric. Era panels solars ni ils aspects da midar il scaldament d’ieli sin lenna ha l’occurrenza gia tractau. Pumpas da calira, sistems da climatisar, la decarbonisaziun, valurs d’isolaziun, greendeal ni baghegiar cun lenn ein entginas autras tematicas.