Pasternaria Goldmann di adia

«Suenter 34 bials ed intensivs onns cun bien success essan nus sedecidi da serrar nies menaschi per ir novas vias.» Quei han Toni e Renata Goldmann scret il gliendisdis en ina circulara alla clientella che la pasternaria furnescha cun ses products. «Cun in egl riend ed in larmond serrein nus l’escha ils 24 d’october 2026», scrivan els. Entochen il davos di s’engaschien els cun tutta forza e plascher per la clientella. Entochen lu sperien els era d’astgar survir vinavon la clientella cun lur products. Serraus vegn era il caffé.

Negina successiun

Sco quei che Toni e Renata Goldman dian, eis ei buca reussiu d’anflar ina successiun pil menaschi: «Nus havein menau plirs discuors per anflar ina soluziun, mo la fin finala ein quels restai senza in resultat positiv. Anflar enzatgi che meina in menaschi da pasternaria e patissaria sco nus havein ei fetg grev, surtut ella periferia.» Toni e Renata Goldmann han surpriu la pasternaria igl emprem da schaner 1993. Els ein stai la tiarza generaziun dalla famiglia Goldmann el menaschi. Josef ed Elisabeth Goldmann ein stai l’emprema, Peter e Käthy Goldmann la secunda. Avon deva ei gia ina pasternaria el medem liug.

La davosa pasternaria

La Pasternaria Goldmann ei la davosa da sia branscha a Mustér. Cura ch’ella siara l’escha en siat meins dat ei negina pasternaria pli a Mustér. «1993 eran nus treis pasterners a Mustér. Sper nus eran quei era las famiglias Herger e Monn», seregorda Toni Goldmann. Il regress da pasternarias ei denton buca mo da constatar a Mustér. Deva ei avon 30 onns aunc rodund in tozzel pasternarias da Sedrun entochen Glion, eis ei oz aunc la mesadad. «Ils temps ein semidai. Ils onns 1970 entochen 1990 ein stai turisticamein fetg buns. Dapi lu ei in tschuppel hotels svanius», seregordan Renata e Toni Goldmann. Mo lu lain era biaras e biars – era indigens – tarmetter ozildi la rauba directamein en casa entras survetschs da detaglists gronds. Quei ha era giu in effect sil diember da collaboraturas e collaboraturs dalla Pasternaria Goldmann: «Ils megliers onns havevan nus tut en tut diesch plazzas da lavur cumpleinas, oz eis ei aunc rodund 700 %.» 

Surbaghegiada cun habitaziuns

El liug nua che la Pasternaria Goldmann e siu caffè sesanflan oz alla Via Cavardiras el center dil vitg a Mustér, vegn ei erigiu ina surbaghegiada. Ils baghetgs vegls vegnan spazzai. Tut en tut vegn ei a dar rodund diesch habitaziuns, la gronda part da 3½ stanzas. La planisaziun persuenter ei gia avanzada.