«Tigls gis olimpics vaia betg tutgia tigls favorits»

Tigls gis olimpics d’anviern 1976 ad Innsbruck veva Heini Hemmi procuro per egna dallas grondas sensaziuns: Igl skiunz da Churwalden ò gudagnea nunspitgia igl slalom gigant. Dumengia passada è el nia a pled aint igl museum da Vaz.

Da taimp an taimp dattigl aint igl museum da Vaz a Zorten en schinumno «Erzählkaffee». Tar chella occurrenza vignan a pled persungas tg’onn bler da rachintar da lour veta singulara. Per l’occurrenza actuala digl «Erzählkaffee» veva Urs Feubli, igl president dall’uniun museum da Vaz, anvido igl anteriour skiunz internaziunal Heini Hemmi, tgi stat a Valbella. La raschung tgi igl om da 77 onns è nia a pled è tgi avant 50 onns, detg pi exact igls 10 da favrer 1976, è el nia victour aint igl slalom gigant tar igls gis olimpics d’anviern ad Innsbruck. Siva da chella victorgia è el er nia campiun mundial aint igl slalom gigant.

Cumparaziun digls gis 1976 ad oz

Dumengia passada vers seira era la Sala Parpan digl museum da Vaz occupada anfignen segl davos plaz. All’antschatta digl sies referat ò Heini Hemmi fatg ena cumparaziun tigls gis olimpics 1976 ad Inns­bruck e tigls gis 2026 da Milano Cortina. Igl domber d’atlets e d’atletas tg’on cumbattia igls 1976 ad Innsbruck per medaglias era tar 1123 persungas da 37 naziuns. Custo vevan igls gis da lez taimp 130 milliuns francs. L’avertura tar la «Bergiselschanze» cun 60 000 aspectatours seia stada imposanta, ò detg Heini Hemmi. Igls gis 2026 seian stads an veir senn en’occurrenza giganta. Dalla parteida seian stos 2900 atlets ed atletas da 90 naziuns ed investeidas seian neidas per chel event radond 7 milliardas euros. Igl victour olimpic ò er managea tgi, schi igl suveran svizzer vegia da decider per u cunter igls gis olimpics 2038 an Svizra, veia el pitost negativ.

Nignas tablettas per durmeir

«Tigls gis olimpics ad Innsbruck vaia betg tutgia tigls favorits», ò punctuo Heini Hemmi. Igl slalom gigant vegia gia li an dus deis e siva igl amprem percurs era el terz cun en retard da passa ena secunda. La notg siva digl amprem percurs digl slalom gigant vess el gia da piglier tenor igls trenaders tablettas per durmeir, chegl tg’el vegia tuttegna betg fatg. «Ia va betg piglia las tablettas cun tameir tgi igl de siva seia an veir senn pi plang per veia sen la pista», ò detg Heini Hemmi cun en surreir. Ad el seia alloura reuschia en ferm sagond percurs. Uscheia vegia el gudagnea la cursa e davanto victour olimpic.

An sia carriera scu skiunz internaziunal ò Heini Hemmi gudagnea an tot quatter slaloms gigants dalla coppa mundiala da skis. Sto igl pi sensom igl podest seia el la staschung da skis 1976/77, ò el menziuno. Ena veira culminaziun seia stada da gudagner igl 1977 igls slaloms gigants dad Ebnat-­Kappel e d’Adelboden.

La furma mentala impurtanta

Gio da sies taimp era la furma mentala da gronda impurtanza. «Igl è propi angal ena tgossa dalla testa, schi vo u schi vo betg tar ena cursa.» El vegia dus anvierns da cursas gia mentalmaintg fadeia ed er adegna puspe crudo or tar cursas. «Cunzont tar las medias veva ia igl surnom ‹Sturzenegger›, cun adegna puspe betg contanscher l’arrivada», ò menziuno Heini Hemmi. Gio digl sies taimps era mintga skiunz sot pressiun. Da reuscheir ainten laƒs cursas dalla coppa mundiala da skis sainza trenar an en cuntign fiss er da chel taimp mianc sto pussebel. Heini Hemmi ò detg tg’el geva la stad vers diesch emdas aint igl Valleis cun skis e schi chegl era betg igl cass, niva treno cundiziun.

En agen stil

Igl skiunz da Churwalden veva en agen stil dad eir cun skis, chegl er cun esser angal 1,63 meters grond. Igls seis skis eran dantant 2,13 meters lungs e per varsaquants centimeters pi lungs tgi chels dad Ingemar Stenmark tg’era ple tgi 1,80 meters grond. Prest pi impurtant tgi igls skis seian stos igls calzers da skis. Ena pitschna midada tigls calzers da skis saptga aveir ena gronda influenza tar ena cursa, ò detg Heini Hemmi. Sa cattar bagn aint igl calzer da skis seia er anc oz per atlets ed atletas da gronda peisa. Sies grond bavegna aint igl Grischun siva d’aveir gudagnea la medaglia dad ôr tigls gis olimpics 1976 ad Innsbruck ò impressiuno Heini Hemmi: Mellas e mellas persungas vegian retschet el scu en rètg, en mument tgi seia anc oz preschaint tar el.