«I dat er autras vuschs criticas»
Il suveran da Surses decida dumengia a l’urna sur da la cumpra da l’Hotel Cube. La radunanza communala ha ditg cleramain GEA al credit d’impegn e la fatschenta vegn sustegnida da la suprastanza communala e differentas organisaziun regiunalas. Damai para la situaziun da partenza d’esser clera. Ma i dat era vuschs criticas. Duas da quellas han prendì posiziun sin dumonda da la FMR.
Dumengia, ils 29 da mars 2026, decida il suveran da Surses sur da la cumpra da l’Hotel Cube. En vista da la votaziun a l’urna para la situaziun da partenza dentant pli che clera. A la radunanza communala dals 23 da favrer han passa 90 % dals preschents approvà il credit d’impegn dad 8,9 milliuns francs per la fatschenta. Ma era la suprastanza communala, l’organisaziun turistica, las Pendicularas Savognin ed autras organisaziuns sustegnan la cumpra (guarda box).
Il messadi dals sustegniders
Las posiziuns da la suprastanza communala, da la Turissem Val Surses Savognin Beiva SA e da las Pendicularas Savognin èn publitgadas en il messadi per mauns da la radunanza communala dals 23 da favrer 2026. Quel è da chattar sin la pagina d’internet da la vischnanca da Surses e cumpiglia ina descripziun pli detagliada da la fatschenta. Davart ils arguments a favur da la cumpra dal Cube ha la FMR rapportà en connex cun la saira d’infurmaziun dals 11 da favrer 2026 (en La Quotidiana dals 13 da favrer ed en la Pagina da Surmeir dals 19 da favrer).
La cumpra dal Cube sustegnan tenor il flyer per in GEA a l’urna en pli las organisaziuns Anavant Surses, Sport d’enviern Beiva, Wasescha Sport, la Scola da skis Savognin, la fatschenta Bananas, l’associaziun da commerzi ed industria Surses, Gastro Albula Surses sco era las partidas regiunalas PS, Center e PLD.
Che quella fetschia naufragi a l’urna, n’è pia betg da spetgar. Ma malgrà la situaziun da partenza è ina da las paucas vuschs criticas – Ruth Giovanoli – relativamain optimistica: «Ina schanza datti adina. Radunanzas communalas e votaziuns a l’urna na suondan en il Surses betg las medemas leschas.» L’anteriura presidenta da Beiva ed experta d’immobiglias è s’exprimida en ina brev da lecturs cunter la cumpra dal Cube. Persula na saja ella dentant betg, sco ch’ella ha ditg envers la FMR: «I dat er autras vuschs criticas. Ma la glieud na vul betg exnum prender posiziun publicamain.»
«Ina ristga nunnecessaria»
Per Ruth Giovanoli èsi cler che la cumpra dal Cube n’è betg chaussa da la vischnanca. Quai ha ella scrit en sia brev da lecturs ed era confermà envers la FMR: «Igl è simplamain ina ristga nunnecessaria. I fiss meglier d’impunder ils daners ord la vendita dal resort Surses Alpin sco planisà per il credit da la scola Grava che per il Cube.» Ch’ins n’ha chattà nagin auter cumprader per l’hotel, mussia gia che la cumpra saja in’investiziun problematica – cunzunt en vista da l’avegnir. «Cun la midada dal clima vegn Savognin ad esser damain attractiv per investiziuns. I n’è betg aut avunda», ha l’anteriura presidenta da Beiva ditg. Auters lieus en il Grischun ed er en Svizra sajan simplamain pli attractivs per investurs e turists.
Ruth Giovanoli sa dumonda damai era, co ch’ins vul insumma emplenir en l’avegnir tut ils hotels ed abitaziuns commerzialisadas a Savognin: «Cun il project a Viols datti gia plirs tschients letgs novs. I vegn a dar in cumbat per ils turists. E per ils hotels gia existents na vegni betg pli simpel, sche la vischnanca porta il deficit per il manaschi da l’albiert da giuventetgna e sfalsifitgescha uschia la concurrenza.»
Cler saja entant che 8,9 milliuns francs na tanschan betg. «I dovra segir credits supplementars per era pudair sanar il plaunterren cun il wellness e la disco. Quels custs n’èn betg calculads en il credit d’impegn», ha Ruth Giovanoli ditg. Quai haja era la suprastanza communala ditg uschia (guarda box).
8,9 milliuns francs
Il credit d’impegn dad 8,9 milliuns francs per la cumpra dal Cube cumpiglia custs da mantegniment ed investiziuns immediatas en il rom da 3,7 milliuns francs. Ils custs per l’hotel sez muntan a 5 milliuns francs ed en pli èsi calculà ina reserva da 200 000 francs per expensas nunspetgadas.
Sco ch’ins po leger en il messadi per mauns da la radunanza communala dals 23 da favrer 2026, èsi da quintar a vista mesauna cun ulteriuras investiziuns. Ils proxims tschintg onns cun radund 100 000 francs e silsuenter 1,8 milliuns francs fin pli u main l’onn 2036.
7 milliuns dal resort Surses Alpin
Il credit d’impegn dad 8,9 milliuns francs vul la vischnanca finanziar per part cun las entradas da la vendita dal resort Surses Alpin. Quai ha il president communal da Surses Daniel Wasescha explitgà a la saira d’infurmaziun dals 11 da favrer 2026. Ins haja fatg radund 7 milliuns francs cun sia cumpart dal resort Surses Alpin. Inizialmain èsi stà previs da duvrar quellas entradas per il credit per la nova chasa da scola Grava.
«In albiert da giuventetgna fiss super»
Ch’ils custs vegnan ad esser pli auts che calculads, quai manegia era Martina Lanz. L’hoteliera e possessura da l’Hotel Post a Beiva refusa la cumpra dal Cube, sco ch’ella ha ditg sin dumonda da la FMR: «Igl è memia char e memia grond – e betg chaussa da la vischnanca.» Ella na possia betg approvar la schliaziun per il Cube sut talas cundiziuns, ma constatescha er: «In albiert da giuventetgna fiss super per la regiun. D’avair dapli giasts giuvens dess vita a la val.»
En quest connex saja ella dentant era sceptica.«Tge capita, sch’i na funcziuna betg cun l’albiert da giuventetgna e sch’il contract vegn schlià suenter tschintg onns?», resumescha Martina Lanz la ristga per la vischnanca. Alura stoppia quella chattar ina nova schliaziun e probablamain puspè far investiziuns.
Optimissem tar il president
Daniel Wasescha, il president communal da Surses, n’ha entant betg vulì commentar ils arguments da Ruth Giovanoli. Sco ch’el ha ditg envers la FMR spetga el dentant in resultat positiv: «A basa dal cler GEA da la radunanza communala e dal sustegn da bleras gruppas d’interess quint jau er a l’urna cun in GEA.»
L’urna è messa si en chanzlia communala venderdi, ils 27 da mars, tranter las 9.00 e las 11.30 e dumengia, ils 29 da mars, tranter las 9.00 e las 9.30.
Gust da leger dapli?