Müdada a la testa da l’Uniun dals Grischs

«Eu sun natüralmaing fich trista cha Victoria s’ha decisa da retrar», declera Gianna Duschletta, co-presidenta da l’Uniun dals Grischs (UdG), in vista a la demischiun da sia collega co-presidenta. «Nus vain gnü üna fich buna collavuraziun quists ultims ons insembel. Ella ha fat sia lavur adüna fich bain, eir cur ch’ella ha manà il presidi suletta.»

Victoria Mosca ha fat a savair a la suprastanza ch’ella vuless far ün congedi d’ün on. E cha cun quai cha sia demischiun es gnüda comunichada fingià la stà passada, s’haja eir gnü avuonda temp da chattar üna o ün successur. Chi cha quella nouva persuna saja, nu laiva Gianna Duschletta però tradir. «Nus vain chattà üna nouva persuna, giuvna, fich motivada e chi ha gronda vöglia da surtour quista lezcha.»

Dad üna vart saja quai schon uschea chi s’haja darcheu ün’interrupziun da la cuntinuità in suprastanza, ma da tschella vart saja ün müdamaint eir darcheu üna nouva schanza. «Nus vain actualmaing ün bun liom tanter pêr in suprastanza. Ün müdamaint dad üna singula persuna rivaina perquai sainz’oter eir da supportar.» Culla nouva persuna spera Gianna Duschletta ouravant tuot sün vent frais-ch, nouvas ideas, nouvs impuls e da pudair tour per mans nouvs progets.

Darcheu ün minus

Quai sarà però eir ün dals unics puncts plü particulars sülla glista da tractandas dürant la prosma radunanza generala da l’UdG chi ha lö als 12 avrigl 2026 a Ftan. Dond però ün sguard süllas lingias grassas dal ultims pêr ons, schi daja bainschi eir ulteriuras tematicas chi pudessan pisserar per üna o tschella discussiun. Per exaimpel: las finanzas.

Avant duos ons ha l’UdG nempe stuvü annunzchar ün deficit da 28 000 francs pel on da gestiun 2023. Quai tanter oter causa lavurs vi da la pagina d’internet. Ed eir quist on varan las commembras ed ils commembers da l’UdG da far bun ün’ulteriura perdita. «L’on 2025 vaina amortisà ils ultims 10 000 francs per ils drets dals dicziunaris. Tras quai resulta darcheu üna perdita plü gronda. Ma almain es il tema dals drets da dicziunaris uschea evas», declera Gianna Duschletta, agiundschond cha la liquidità saja però sün ün bun livel e chi’s cumporta pervi da quai eir quella perdita.

Quant ot cha’l minus sarà lura darcheu a la fin finala, po la co-presidenta pür dir cur cha la revisiun – chi ha lö quists dis – es fatta. Chi’s tratta però d’ün import tanter la perdita da l’on da gestiun 2023 da 28 000 francs ed il guadogn da 6300 francs da l’on passà.

Ün sguard i’l avegnir positiv

E discurrind da finanzas procura eir il Chalender Ladin per üna o tschella foda implü sül frunt. «Displaschaivelmaing es la vendita dal Chalender Ladin darcheu ida inavo in congual cun l’on passà. Quai es üna da nossas ediziuns importantas – chi caracterisescha nossa uniun – e da stuvair verer quist svilup, ans fa schon ün zich mal il vainter.» L’avegnir dal Chalender Ladin nu saja actualmaing insomma na amo periclità, però i’s stopcha al listess mumaint eir tegner in ögl la situaziun per pudair reagir bod avuonda.

Gianna Duschletta es però da fich buna spranza pel avegnir e renda perquai eir bler plü gugent attent a tuot las üettas chi spettan il 2026. «Nus pudain edir quist on üna fich bella Chasa Paterna chi vain publichada dürant il decuors da quista prümavaira. Lura daja ün ulteriur poetry slam, forsa eir amo üna o duos prelecziuns cun musica, quai es amo in planisaziun. Implü saran nus preschaints a singuls marchats e fain maisas da cudeschs. Quai faina bod il plü gugent. Là gnina in contact culla glieud e pudain preschantar e vender noss bels cudeschs», conclüda Gianna Duschletta, s’allegrond uossa il prüm però üna jada sün üna radunanza generala paschaivla ed üna nouva obain ün nouv collega pel co-presidi.