Saults e benedicziuns
La Societad da musica da Vignogn ha envidau vendergis e sonda a siu concert primavaun. Il tetel «Celtic Brass» ha carmalau e fatg gust. El center ei stau il toc «Cry of the Celts» en tschun parts. In toc variont e pretensius da sunar, denton in deletg da tedlar.
Ella part «Breakout» han ils solo cornetists menau. Els han manizzau il ritmus, tschels registers ein entrai e suandai. Igl ei vegniu pli e pli spert. Energicamein e precis ei la formaziun vegnida al punct culminont. Ella part «Lament» lu il cuntrast, ina ballada lirica quietonta. Il cumponist dalla suita «Cry of the Celts», gl’Irlandes Ronan Hardiman, ha descret en sia musica scenas dalla historia irica, ins ha saviu s’imaginar cuntradas verdas, collinas cun castials, pastiras ed undas burasclusas dalla mar. Gl’arranschader Peter Graham ha cumbinau musica folcloristica cun elements da rock e dramatica. Ella tschunavla e davosa part «Victory» han ins udiu la melodia finala, quasi in himni, cun tempo sportiv. Era en quella ein ils registers s’exponi, e solists dalla Musica da Vignogn han interpretau las passaschas precis e perschuadent.
Spert e sportiv
Il dirigent Remo Derungs ha presentau quella suita cun ina formaziun che damogna in tal pensum pretensius. Gl’arranschament da Peter Graham ei buca staus il sulet. Il moderatur dil concert, Daniel Candinas, haveva annunziau ina sera freida cun bisa dil nord. Freid eis ei tuttavia buca stau da tedlar e guder ils tuns da parada. Denteren havess enqualin giu gust da sesalzar e saltar in Line ni Step Dance.
Era tier auters tocs han musicantas e musicants stuiu manizzar sedischavlas en liungs percuors. Pigl auditori eis ei stau in divertiment e gl’applaus ei staus sincers. Plirs tocs dil concert aud’ins adina puspei en connex cun musica da brass celtica. Aschia per exempel «Riverdance», «Irish Blessing», ed il marsch «Gaelforce» alla fin.
La Musica da Vignogn ha era sunau «Lord Tullamore». Igl ei in toc dil Hollandes Carl Wittrock. Quel ha seschau inspirar dil casti «Charlesville Castle» e dalla regiun el center dall’Irlandia. Impressiun speciala a quei concert ha la cumpactadad dalla formaziun e las habilitads dils singuls fatg. Remo Derungs sa sefidar da musicantas e musicants ambizius. Quei garantescha agl auditori il gudiment. A gliez survescha la musica, ella embellescha, diverta, sveglia emoziuns. A quei concert primavaun han tals muments dominau.
Gust da leger dapli?